Búgingi Joldaý buǵan deıingi halyqqa arnalǵan Joldaýlardyń zańdy jalǵasy dep bilemin. Onda halyqtyń turmysyn jaqsartýǵa, elimizdiń odan ári ósip-órkendeýine qatysty aıtylǵan mańyzdy máseleler qamtyldy.
Prezıdenttiń osy jolǵy Joldaýy buǵan deıingi áleýmettik jobalardyń jıyntyǵyndaı boldy. Eldiń tynys-tirshiligine qatysty birde-bir másele nazardan tys qalǵan joq. Toptastyryp aıtar bolsaq, áleýmettik ahýal, halyqtyń turmysy, zeınataqysy, eńbekaqysy, jalpy kúnkórisi, qaýipsizdigi, oǵan qosa ınfraqurylymdy damytý syndy mańyzdy dúnıelerdiń barlyǵy sóz boldy. Mysal retinde aıta keter bolsam, balabaqsha men mektepterdegi balalardyń tárbıesine, qaýipsizdigine júıeli túrde kóńil bólýge erekshe ekpin berilip otyr. Jalpy, osy Joldaýda bilim berý sapasy, joǵary oqý oryndary túlekteriniń básekege qabilettiligi, olardyń qoǵamda suranysqa ıe bolýy týraly kóp dúnıeler aıtyldy. Qazir jastar úshin oqý bitirip, dıplom alyp shyǵý azdyq etedi, olardyń bilimi men qarym-qabileti elimizde jáne halyqaralyq deńgeıde suranysqa ıe bolýǵa tıis. Bul zamannyń alǵa qoıyp otyrǵan talaby.
Memlekettik apparattardyń jaýapkershiligi, máselen quqyq qorǵaý organdarynyń taza jumys isteýi, sottar men prokýratýranyń zańdy qatań saqtaýy da óte mańyzdy dep sanaımyn. Sot salasyn múlde tazartý kerek, sýdıalarǵa qatysty aıtylyp júrgen túrli áńgimelerdiń bárinen bul salany aryltý qajet. Osy aıtylǵandardyń barlyǵy bir-birimen tyǵyz baılanysty.
Memleket basshysy árbir memlekettik qyzmetker, árbir ýchaskelik polıseı Prezıdenttiń eldiń arasyndaǵy ókili ekenin aıtty. Shynynda da dál solaı. Eger adamdardyń bir nársege kóńili tolmasa, jergilikti memlekettik qyzmetkerler onyń aıtqan sharýasyn sheship bere almasa, onda jurt arasynda memlekettik deńgeıde jumys durys jasalmaǵan degen pikir týyndaýy múmkin. Búgin Elbasy eki saǵatqa jýyq sózinde osy aıtylǵan máselelerdiń bárin qamtydy. Salıqaly, mazmundy áńgime boldy, biz kútken dúnıeler aıtyldy. Kókeıde júrgen saýaldardyń barlyǵyna qanaǵattanarlyq jaýap aldyq.
Qýanysh SULTANOV,
Parlament Májilisiniń depýtaty