Sezd Hatshylyǵynyń Basshysy Qasym-Jomart Toqaev Álemdik jáne dástúrli dinder lıderleri Seziniń aıasynda BUU О́rkenıetter Alıansynyń Joǵary ókili Nasır Abdýlazız Ál-Nasermen kezdesti. Senat Tóraǵasy osy jyldyń sáýir aıynda BUU Qaýipsizdik Keńesindegi Arrııa formýlasy boıynsha kezdesý ótkizý kezinde qoldaý kórsetkeni úshin BUU Bas hatshysynyń arnaýly ókiline alǵys bildirdi. Atalǵan kezdesý aıasynda Sezd maqsattary men tujyrymdamasynyń tanystyrylymy ótken bolatyn, dep habarlaıdy Parlament Senatynyń baspasóz qyzmeti
Q.Toqaev qazirgi uıym negizinde Konfessııalar men órkenıetter únqatysýy jónindegi Prezıdent N.Nazarbaevtyń ortalyǵy qurylatyny týraly habardar etti. Josparlanyp otyrǵandaı, Ortalyq Álemdik jáne dástúrli dinder lıderleri Seziniń maqsattary men mindetterin halyqaralyq arenada ilgeriletý jáne forýmdy ınstıtýttandyrý isinde mańyzdy qural bolmaqshy.
N.Al-Naser bul bastamany qoldaıtynyn, sondaı-aq «Únqatysýdan aınymaý: aldyn-alý sharalary jáne beıbitshilikti qoldaý jolyndaǵy áriptestik» taqyryby boıynsha qarasha aıynda Nıý-Iorkte ótetin О́rkenıetter Alıansynyń Jahandyq forýmyna daıyndyq barysy týraly aıtty.
Kıeli Taqtyń dinaralyq únqatysý jónindegi Papa keńesindegi ıslammen baılanys bóliminiń meńgerýshisi monsenor Haled Akashemen áńgime barysynda Q.Toqaev Rım-katolık shirkeýiniń beıbitshilik pen yntymaqty qoldaý jáne órkenıetter men dinder arasyndaǵy dıalogty damytý qyzmetin joǵary baǵalap, Astanada ótip jatqan forýmǵa qoldaý kórsetkeni úshin alǵys bildirdi.
Q.Toqaevtyń pikirinshe, «Qazaqstan men Vatıkan arasyndaǵy qarym-qatynas ózara túsinistik pen senimge negizdelgen syndarly is-qımyldyń úlgisi bolyp tabylady».
Senat Tóraǵasy qazaqstandyq katolıkterdiń elimizdegi beıbitshilik pen kelisimdi nyǵaıtýǵa qosqan úlesin atap ótti.
H.Akashe aldaǵy ýaqytta qurylatyn Konfessııalar men órkenıetter arasyndaǵy únqatysý jónindegi Prezıdent N.Nazarbaevtyń ortalyǵynyń qyzmetine yqylas bildirip, Vatıkannyń Álemdik jáne dástúrli dinder lıderleri Seziniń izgi bastamalaryn tolyǵymen qoldaıtynyn jetkizdi.