Kenshiler astanasynda «Áýendi Saryarqa» halyqaralyq festıvaliniń shymyldyǵy saltanatty túrde ashyldy. Osymen jıyrmasynshy ret uıymdastyrylyp otyrǵan óner baıqaýy 15 qazanǵa deıin jalǵasady. Festıval bastalmas buryn Qaraǵandydaǵy «Juldyzdar alleıada» belgili dırıjer, Qazaqstannyń eńbek sińirgen qaıratkeri, Memlekettik úrlemeli aspaptar orkestriniń kórkemdik jetekshisi Qanat Ahmetovtiń qurmetine ataýly juldyz qoıyldy.
– Men óte baqyttymyn. Osyndaı nıetterińiz úshin, meniń eńbegimdi baǵalaǵandaryńyz úshin basymdy ıip alǵys aıtamyn. Festıvalimiz bolashaqta da jandanyp, árdaıym kórermenin qýanta bersin, dedi ataqty dırıjer.
«Juldyzdar alleıasy» Qaraǵandynyń ortalyq saıabaǵyna kireberiste, «Kenshi dańqy» eskertkishiniń janynda ornalasqan. Ol 2007 jyly «Qaraǵandy – jastyǵymnyń qalasy» atty birinshi retro-festıval kezinde ashylǵan bolatyn.
«Juldyzdar alleıasy» el mádenıetiniń damýyna súbeli úles qosqan, shyǵarmashylyǵymen Qazaqstandy álemge tanymal etken tulǵalarǵa arnalǵan. Alleıadaǵy alǵashqy juldyz halyq ártisi Bıbigúl Tólegenovaǵa ornatyldy. Sondaı-aq, bul jerde Roza Rymbaeva, «Dos-Muqasan» ansambli, Qaırat Baıbosynov, Eskendir Hasanǵalıev, Maqpal Júnisova, Bolat Syzdyqov syndy óner maıtalmandarynyń ataýly juldyzdary bar.
Qaırat ÁBILDA,
«Egemen Qazaqstan»
QARAǴANDY