Túrkistan oblysy Sozaq aýdanynyń 90 jyldyǵyna oraı Sholaqqorǵan aýyly «Myńjylqy» mádenıet saraıynda «Sozaq-jyr, Sozaq-sóz, Sozaq-óner» atty ǵylymı tájirıbelik konferensııa ótti.
- Elbasy Nursultan Nazarbaev «Bolashaqqa baǵdar: rýhanı jańǵyrý» atty baǵdarlamalyq maqalasynda: «Týǵan jerdiń árbir saıy men qyrqasy, tańy men ózeni tarıhtan syr shertedi. Árbir jer ataýlynyń tórkini týraly talaı-talaı ańyzdar men áńgimeler bar. Árbir ólkeniń halqyna sýyqta pana, ystyqta saıa bolǵan, esimderi el esinde saqtalǵan birtýar perzentteri bar. Onyń bárin jas urpaq bilip ósýge tıis», - dep atap kórsetken bolatyn. Túrkistan oblysynda naǵyz qasıetti de kıeli jerler kóp. Sonyń biri de biregeıi, áýlıeli, kıeli, shertpe kúıdiń otany bolǵan - Sozaq aýdany. Tekti topyraq Sozaq ulttyq ádebıetimizdiń sırek daryn ıesi Táken men Sáýirbekti, Asqar men Tólegen, Bátımalardy ómirge alyp keldi. Teriskeıdiń aıaýly perzenti Asqar Súleımenovshe aıtsaq, «Sozaq darııa...Sozaq qarııa... Sozaq minez» degeni osynda bolsa kerek. Búginde Sozaq aýdany óndirisi órlegen, sharýashylyǵy shalqyǵan oblystaǵy kósh bastaýshy aýdandardyń birine aınalǵan, - dedi konferensııada sóz alǵan oblys ákimi Janseıit Túımebaev.
Sondaı-aq ǵylymı jıynda 1985-1991 jyldary Sozaq aýdandyq partııa komıtetiniń birinshi hatshysy qyzmetin atqarǵan D.Sherimqulov, Táýelsizdiktiń alǵashqy jyldarynda Sozaq aýdanynda tuńǵysh ákimi bolyp qyzmet atqarǵan Á.Ombaev, 1994-1999 jyldary Sozaq aýdanynyń ákimi bolǵan Q. Aıtahanov syndy azamattar óńirdiń tarıhynan syr shertti. Aýdannyń órkendeýine úles qosqan birqatar azamattar oblys ákiminiń Gramotasymen jáne Alǵys hatymen marapattaldy.Aýdandyq aýrýhana ujymyna medısınalyq avtokólikterdiń kilti tabys etildi.
Bul kúnimereıtoıǵa oraı 24 nysan el ıgiligine tapsyryldy. Olardyń qatarynda Qumkent aýylyndaǵy sport kesheni, Sholaqqorǵan aýylyndaǵy 50 oryndyq «Aıjan» bóbekjaı balabaqshasy, «Jibek joly» saýda kesheni, Qaraǵur aýylynda «Jastar» saıabaǵy, 2 sport alańy men 1 balalar oıyn alańy bar. Sholaqqorǵanda ult, memleket damýy jolynda aıanbaı eńbek etken, azamattardyń esimin el jadynda qaldyrý maqsatynda «Sosıalıstik Eńbek Eri» atanǵan azamattardyń bıýstteri ornatyldy. Bıýstteri qoıylǵan azamattardyń qatarynda shertpe kúıdiń negizin qalaýshy J.Qalambaev, S.Áliuly, T. Mombekov, G.Asqarov syndy tulǵalar bar. Sonymen qatar, Baldysý, Rań ata, Shaǵa, Aqsúmbe eldi mekenderinde medısınalyq pýnktter, Sholaqqorǵan aýylynda alleıa, sport jáne balalar oıyn alańshasy men «Street Workout» sporttyq alańynyń tusaýy kesildi. Taýkent qalasynda sport alańshasy, Jartytóbe eldi mekeninde «Astana qalasyna 20 jyl» saıabaǵy, sport alańshasy men balalar oıyn alańy, 75 oryndyq «Asyljan» bóbekjaı babaqshasy paıdalanýǵa berildi.
Ǵalymjan ELShIBAI,
«Egemen Qazaqstan»
Túrkistan oblysy