Qurlyqtyq hokkeı lıgasynda (QHL) kúsh synasyp júrgen Astananyń «Barysy» kezekti týrda Ombynyń «Avangardynan» 3:5 esebimen utyldy.
Bul báseke 47 mınýt boıy asa shıelenisti tartyspen ótti. Sol ýaqyt aralyǵynda aıdyn ıeleri úsh márte alǵa shyqqanymen, qonaqtar kóp uzamaı esepti teńestirip otyrdy. Atap aıtsaq, ombylyq Davıd Dearne, Sergeı Shırokov jáne Ilıa Mıheev soqqan shaıbalarǵa astanalyq Darren Dıs, Mettıý Frettın jáne Dastın Boıd laıyqty jaýap qaıyrdy. Biraq oıynnyń aıaqtalýyna 10 mınýttaı ýaqyt qalǵanda «qaharyna mingen» ombylyq hokkeıshiler qatarynan eki ret nysanany dál kózdedi. Bul goldyń avtorlary – Alekseı Emelın men Ilıa Mıheev. Osylaısha, jerlesterimiz 3:5 esebimen «Avangardqa» ese jiberdi.
Qazirgi kezde QHL-dyń turaqty birinshiliginiń jarys kestesinde «Barys» 11 oryndy ıelenýde. Olar 15 kezdesýden keıin 20 upaıdy ıelenýde. Goldar aıyrmashylyǵy – 57-48. О́ziniń kelesi básekesin elordalyq klýb 16 qazanda Ekaterınbýrg qalasynda jergilikti «Avtomobılıstke» qarsy ótkizedi.
Ǵalym SÚLEIMEN,
«Egemen Qazaqstan»