15-16 qazan kúnderi Erevan qalasynda Táýelsiz Memleketter Dostastyǵy ǵalymdarynyń II forýmy ótedi, dep habarlaıdy TMD Atqarý komıtetiniń baspasóz qyzmeti.
Forým TMD-ǵa qatysýshy memleketterdiń Memleketaralyq gýmanıtarlyq yntymaqtastyq qorynyń qoldaýymen ótpek. Ǵylymı sharanyń basty uıymdastyrýshylary - Armenııa Respýblıkasynyń Ulttyq ǵylym akademııasy men Ǵylym jáne bilim mınıstrligi.
«Forýmdy ótkizýdegi basty maqsat - TMD elderiniń ǵylymı-tehnıkalyq yntymaqtastyǵyn jandandyrý jáne damytý, birlesken zertteýler júrgizýge jańa serpin berý, elderdiń ınnovasııalyq saıasatyn damytý jóninde usynystar ázirleý, sondaı-aq jastar arasynda ǵylym men ǵylymı qyzmetti nasıhattaý», - deıdi TMD Atqarý komıtetiniń qyzmetkerleri.
Jalpy otyrystan tys, forým aıasynda «Irgeli ǵylymnyń qazirgi ahýaly jáne damý perspektıvalary», «Sıfrlyq kezeńdegi ǵylymı yntymaqtastyqty jetildirý», «Innovasııalyq ǵylymı zertteýler» taqyryptarynda dóńgelek ústelder ótedi.