Qazaq memlekettik qyzdar pedagogıkalyq ýnıversıtetiniń arnaıy brıgadasy «Týǵan jerge taǵzym» jobasynyń aıasyndaǵy tanymdyq saparyn bastaý úshin búgin Almaty oblysy Sarqan aýdanynyń Cherkassk aýyldyq okrýgine keldi.
Sapar Qazaqstan Prezıdenti N. Nazarbaevtyń «Bolashaqqa baǵdar: rýhanı jańǵyrý» atty baǵdarlamalyq maqalasynan týyndaǵan jobany jergilikti jerde júzege asyrý maqsatynda uıymdastyrylyp otyr.
Úgitshiler brıgadasyn munda Qazaq memlekettik qyzdar pedagogıkalyq ýnıversıteti Tárbıe jáne áleýmettik jumystar jónindegi departamentiniń dırektory Jańagúl Sultanova bastap keldi. Delegasııa músheleri sapardy Aqtuma aýylynan bastady. Osyndaǵy Petropavl orta mektebinde aldymen ýnıversıtettiń «Umaı Ana» úıirmesiniń fılıaly saltanatty jaǵdaıda ashyldy. Onyń ashylýy jónindegi qujatqa ýnıversıtet departamentiniń dırektory men mektep dırektory Baýyrjan Ibraıymova qol qoıdy.
Budan keıin aýyl turǵyndary men mektep ujymy túgel qatysqan jıyn boldy. Onda ýnıversıtet oqytýshylary ónertaný ǵylymynyń múmkindikteri men salalary, jas urpaq boıynda estetıkalyq mádenıetti qalyptastyrý, adamgershilikke baýlý, sheshendik óner, ózin-ózi ustaı bilý mádenıeti, mektep oqýshylarynyń ata-ana men muǵalim, qorshaǵan ortaǵa degen qarym-qatynasyn jaqsartýdyń joldary men tásilderi, oqýshylardyń ósý prosesinde, olardyń jas jáne jeke pedagogıkalyq-psıhologııalyq erekshelikterine qaraı qaqtyǵystyń sebepteri men saldarlaryn anyqtaý jáne olardy sheshýdiń joldary týraly dárister oqyp, jınalǵandar suraqtaryna jaýap berdi.
Sońynan mektepke rýhanı jańǵyrýǵa baılanysty shyǵarylǵan 17 kitap tartý etildi. Budan keıin ýnıversıtet delegasııasy aýyldyq okrýgtegi Cherkassk jáne Qarǵaly aýyldarynda da bolady. Sapar qazannyń 18-ine deıin jalǵasady.