Oblys ortalyǵynda qalalyq sáýlet jáne qala qurylysy bóliminiń málimetinshe, bul kúnderi qurylysy toqtap qalǵan nysan ıelerimen jumys júrgizilýde.
Qurylysy uzaqqa sozylǵan 25 nysannyń 23-iniń ıeleri ákimshilik jaýapkershilikke tartylyp, 4,3 mıllıon teńge kóleminde aıyppul tóledi. Nysandardyń 4-i memlekettik menshikke qaıtarylsa, 4 nysanda qurylys jumystary bastalypty.
Qalalyq ákimdik oblys ortalyǵyndaǵy ortalyq kóshe Táýelsizdik dańǵyly, 89/4, 89/5 mekenjaıynda ornalasqan ǵımarattar- endi jarqyrǵan saýda úılerine aınalady dep sendiredi.
Mysaly, 2004 jyly oblys ortalyǵynda ómirbaqı bas bostandyǵynan aırylǵandarǵa arnalǵan 1500 oryndyq kolonııa qurylysy bastalǵan-dy. Qazir túrmege suranys joq degen sebeppen 2008 qurylys toqtatylady. Bitpegen qurylys qalalyq ákimdiktiń balansyna beriledi. Jekeshelendirý baǵdarlamasy aıasynda satylymǵa shyǵatyn nysandar tizimine alynypty. Quny-3 mlrd 800 mıllıon teńgege jetken.
Suranys bolmasa,nege qurylys bastaǵan? Jaýapkershilik kimde? Sonymen birge, «Saryarqa» shaǵyn aýdanynda salynyp jatqan №27 turǵyn úıdiń qurylysy da qazir qurylysy toqtap tur. Jalpy, bul shaǵyn aýdanynda jyl sońyna deıin 8 turǵyn úıdiń berilýin turǵyndar asyǵa kútýde.
Farıda BYQAI,
«Egemen Qazaqstan»
Pavlodar