Ýaqyt ózgerip, qoǵam damyǵan saıyn júkteler mindet pen oryndalýǵa tıisti maqsattyń arta túsetini sózsiz. Elimizde 4 baǵyt boıynsha júzege asatyn «Sıfrly Qazaqstan» baǵdarlamasy – memleket damýynyń negizgi kórsetkishi. Elbasy tapsyrmasynan týyndaǵan mindetter búginde Jambyl óńirinde qyzý iske asyrylýda.
Jambyl oblysy ákimdiginde oblys ákimi Asqar Myrzahmetovtiń qatysýymen óńirlik jobalyq basqarý ofısiniń jumysy jáne «Sıfrly Qazaqstan» memlekettik baǵdarlamasynyń oblys aıasynda júzege asýy boıynsha jıyn ótti. Jıynda óńirdegi bilim berý, densaýlyq saqtaý, mádenıet, qyzmet kórsetý jáne ózge de salalardy sıfrlandyrý baǵytyndaǵy atqarylyp jatqan is-sharalar talqylandy. Oblystyq ınvestorlarǵa qyzmet kórsetý, jobalyq basqarý jáne sıfrlandyrý ortalyǵynyń dırektory Damır Segizbaev kún tártibindegi másele boıynsha baıandama jasap, jemisti jumystar jóninde áńgimeledi.
Osy ýaqytqa deıin baǵdarlama aıasynda 182 534 adam oqytý kýrsynan ótýi tıis bolsa, bul jospar búginge deıin tolyq oryndalǵan. Oblys ákimi Asqar Myrzahmetov bul kórsetkishti jyl sońyna deıin taǵy da arttyrý joldaryn qarastyrý kerektigin basa aıtty.
«Sıfrly Qazaqstan» baǵdarlamasy aıasynda 2018 jyly óńirdiń tehnıkalyq múmkindigine sáıkes mektepterdiń 93 paıyzynda Internet jyldamdyǵyn 4-40 mbıt/s joǵarylatý kózdelip otyr. Al keler jyly ony 100 paıyzǵa jetkizý josparlanǵan. Sonymen qatar bıylǵy jyly Taraz qalasyndaǵy 111 balabaqshada elektrondy kezekke qoıý júıesi tolyǵymen avtomattandyrylatyn bolady.
Jambyl oblystyq bilim basqarmasynyń basshysy Rahııa Turmahanbetova sala boıynsha atqarylyp jatqan jumys barysymen tanystyrdy.
– Búginde keń arnaly ınternet jelisine qosylǵan mektepter sany 447 bolyp, 100 paıyzǵa jetip otyr. «Kúndelik» jobasyna 433 mektep qosylǵan. Al «Bilimland» sıfrly bilim berý resýrstary portalyna 447 mektep qosylǵan. 429 mektep onlaın, 18 mektep oflaın tásilinde platformany paıdalanady. Symsyz ishki Wi-Fi jelisimen 199 mektep jaraqtandyrylǵan. Sonymen qatar 346 mektep 983 kompıýter, proektor, ekran sııaqty ınteraktıvti qurylǵylarmen jabdyqtalǵan. 370 mektepke 1866 ınteraktıvti taqta ornatylyp, STEM bilim berýdi engizý úshin 83 robot tehnıka kabınetterimen jabdyqtalǵan. Oblys boıynsha 11 IT-synyp ashyldy, – dedi basqarma basshysy.
R.Turmahanbetova sondaı-aq kolledj bitirýshilerdiń jumysqa ornalasýyn esepke alý jáne qabyldaý avtomattandyrylǵan aqparattyq júıesin engizýge memlekettik satyp alý ashyq konkýrsy júzege asyrylyp, áleýetti ónim berýshi anyqtalǵanyn aıtty. Búgingi tańda kolledjder boıynsha málimetter aqparattyq júıege engizilýde eken.
Basqosý barysynda aýyldyq klýbtardaǵy aqparattyq ortalyqtardyń ashylýy, mekemelerdiń kompıýterlermen qamtylýy sekildi jumystar da saralandy.
Jıyn sońynda Asqar Myrzahmetov jaýapty adamdarǵa kórsetkishterdi arttyrý úshin eki-úsh jyldyq josparǵa baılanbaı, jaıbasarlyqqa salynbaı, ýaqyt ozdyrmaı iske asyrý kerektigin eskertip, tıisti basshylarǵa naqty tapsyrmalar júktedi.
Hamıt ESAMAN,
«Egemen Qazaqstan»
Jambyl oblysy