Qazaqstanda alǵash ret bıznes salasyna qatysty «Negizin salýshylar» – «Osnovatelı» atty realıtı-shoý jobasy qolǵa alyndy. Atalǵan jobaǵa qatysamyn degen azamattardan ótinim qabyldaý 2018 jyldyń 18 qazanynan bastalady.
«Negizin salýshylar» – «Osnovatelı» Qazaqstandaǵy YouTube arnasyna shyǵarylatyn alǵashqy shynaıy bıznesshoý jobasy bolyp tabylady.
Jobaǵa jańa iskerlik ıdeıasy bar jáne ony iske asyrýdy kózdeıtin 18 ben 25 jas aralyǵyndaǵy qazaqstandyq kez kelgen azamat qatysa alady. Ol úshin talapkerler 2018 jyldyń 15 qazany men 15 jeltoqsany aralyǵynda jobanyń osnovateli.kz saıtyna óz ótinimderin joldaýy tıis.
Irikteý qorytyndysy boıynsha eń tıimdi ári perspektıvaly degen 21 bıznes-joba anyqtalatyn bolady. Olardyń avtorlary bir aı boıy TMD aýmaǵyndaǵy eń myqty bıznes-jattyqtyrýshylarmen daıyndalady jáne bıznes-lagerge shaqyrylady. Sondaı-aq olar qazaqstandyq iri kásipkerlerdiń qamqorlyǵymen óz jobalaryn qazylar alqasy aldynda odan ári qorǵaýǵa daıyndalady. Budan keıin qazylar alqasy eń tıimdi dep tabylǵan 3 jobany tańdap alady. Al osy úsh joba boıynsha birinshi, ekinshi, úshinshi oryn alǵandar anyqtalyp, olarǵa sáıkesinshe on, bes jáne úsh mıllıon teńge beriledi. Halyq jobaǵa qatysty barlyq úderisterdi, ıaǵnı qatysýshylardyń óz jumystaryn daıyndaý, ony qorǵaý prosesterin YouTube kanaly arqyly kóre alady.
Joba Qazaqstandaǵy shaǵyn jáne orta bıznestiń damýy úshin jastar arasynda bıznesti bastaý jáne iske qosý isine qyzyǵýshylyqty arttyrý arqyly alǵysharttar jasaýǵa baǵyttalǵan.
«Negizin salýshylar» jobasy tolyǵymen jeke joba bolyp tabylady. Onyń memlekettik uıymdarmen eshqandaı qatysy joq. Degenmen, jobanyń mańyzdylyǵyna baılanysty Qazaqstan Aqparat jáne kommýnıkasııalar mınıstri Dáýren Abaev ony qoldaıtynyn málimdedi.
D.Abaev atalǵan jobanyń bastalýyna oraı «Bıznes – kez kelgen ekonomıkanyń negizi bolyp tabylady. Ol halyqtyń ál-aýqatyn arttyrýdy qamtamasyz etedi, al kásipkerler orta taptyń negizin quraıdy. Qazirgi tańda Qazaqstanda bıznesti qoldaýǵa, damytýǵa úlken kúsh jumsalyp otyr», dedi.
Onyń aıtýynsha, «Negizin salýshylar» – «Osnovatelı» atty bul jańa joba jastardyń bıznes bastamalaryn qoldaýǵa baǵyttalǵan ıgi qadam bolyp tabylady. Sondaı-aq mınıstr atalǵan jobanyń qazaqstandyqtar úshin tabysqa jetýdiń, ıgilikti isterdiń bastaý alatyn alańyna aınalatynyna senim bildirdi.
«IC group» holdınginiń jetekshisi Larıon Lıan jobanyń demeýshisi bolyp tabylady. Ol demeýshisi jobany qolǵa alýdaǵy negizgi maqsat týraly bylaı dedi:
«Men ózimniń ómirlik tájirıbemdi qazirgi jastarmen bóliskim keledi. Talantty jastardyń óz bıznesterin bastaýdan bas tartatynyn, tipti óz kásibin ashýdy bastamaq túgili, oǵan tyryspaıtynyn oılap kórińizshi... Jastar istiń kózin tabýdy, qolǵa alǵysy kelgen sharýasyn qalaı bastaýdy bilmeıdi de, ile kúdikke shyrmalyp qalady. О́zine kúmánmen qaraý ony óz qabiletin baǵalamaýǵa alyp keledi de tabysqa jete almaıdy. Sondyqtan olarǵa jol kórsetkenimiz abzal».
Shoýdyń birinshi shyǵarylymy 2019 jyldyń aqpan aıyna josparlanǵan.