Májilistiń bir top depýtaty Batys Qazaqstan oblysyna jasaǵan jumys sapary barysynda úsh aýysymda oqıtyn №47 jalpy bilim beretin mektep jumysymen tanysty.
Elimizde 127 mektep úsh aýysymda bilim berýge májbúr bolsa, 44 mektep ǵımaraty apat jaǵdaıynda tur. Elbasy «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynda bilim salasyna erekshe kóńil bólip, joǵarydaǵy máseleni tez arada sheshýdi tapsyrǵan bolatyn. Qazaqstan Parlamentindegi «Nur Otan» partııasy fraksııasynyń músheleri Aızada Qurmanova, Aıgúl Nurkına, Jámıla Nurmanbetova, Svetlana Bychkova jáne «Aqjol» partııasy fraksııasynan Keńes Absatırov Elbasy Joldaýynan týyndaıtyn máselelerdi talqylaý úshin Oral qalasynyń Zachagansk aýdanynda jobadaǵy 1200 oqýshynyń ornyna 2800-deı bala oqyp jatqan №47 mektepti arnaıy aralap kórdi.
Batys Qazaqstan oblysynda úsh aýysymda bilim berip jatqan mektep sany beseý, olar – Oral qalasyndaǵy №10, 18, 20, 47 jáne estetıkalyq baǵytta bilim beretin gımnazııa. Jalpy BQO boıynsha 2163 oqýshyǵa oryn jetispeıdi.
- Úsh aýysymda oqytatyn mektepter týraly Prezıdent Joldaýynda da aıtylyp, bul máseleni tez arada sheshý tapsyrylǵan edi. Sonymen birge «Pedagog mártebesi týraly» jańa zań jobasyn jergilikti muǵalimdermen talqylaý úshin óńirlerge keldik. Bilim berýdiń qoljetimdiligin arttyrý úshin 2019-2021 jyldary respýblıka bıýdjetinen qosymsha 50 mlrd teńge bólinetin boldy. Elimiz boıynsha 10311 bilim mekemesi bar, onyń 68%-y memlekettik bolsa, qalǵany jekemenshik. 90 myńnan asa pedagog mamandardyń 55 myńy tárbıeshi bolyp qyzmet etedi. Elimizde pedagog kadrlardyń ortasha jalaqysy 76 myń teńge bolsa, tárbıeshiler 30 myń teńge aılyq alady. Kórip otyrǵanymyzdaı, alda sheshilýi tıis másele kóp. Sondyqtan jergilikti jerlerdegi jaǵdaıdy kózimizben kórip, Elbasy Joldaýyn júzege asyrýǵa naqty kómegimizdi kórsetkeli keldik, - deıdi Májilis depýtaty Aıgúl Nurkına.
Parlament depýtaty Jámıla Nurmanbetova óz sózinde Prezıdent Joldaýyna sáıkes aldaǵy bes jyl ishinde elimizde ǵylym, bilim jáne densaýlyq salasyna bólinetin qarajatty ishki jalpy ónimniń 10 paıyzyna deıin kóterý týraly strategııalyq mindet qabyldanǵanyn, bul mejege jetý úshin keshendi sharalar qajettigin aıtty. «Qaı jerge qandaı mektep qajettigi jóninde máseleni jergilikti ákimdikter mınıstrlikpen birge tez arada sheshýi qajet. Mektep ǵımarattaryn josparlaýda demografııa men mıgrasııa kórsetkishteri eskerilýi kerek» deıdi depýtat. Sonymen birge bala qaýipsizdigi úshin bilim mekemelerin 100 paıyz baqylaý kameralarymen qamtý kerek. Jergilikti ákimdik dereginshe, keleshekte Zachagansk kentinde 1200 oryndyq taǵy bir mektep salynýy josparlanǵan. Biraq Batys Qazaqstan oblystyq bilim basqarmasynyń basshysy Sholpan Qadyrovanyń pikirinshe, aýdan turǵyndarynyń demografııalyq ósimi men qurylys qarqynyn eseptesek, bul aýdanǵa áli eki mektep qajet.
- Árıne, oqýshy sanynyń kóptigi biraz qyndyq týdyrady. Mysaly, daıyndyq bóliminde bir synypta 35 oqýshyǵa deıin bilim alady. Degenmen, biz bilim sapasyna kóńil bólip, barynsha qyzmet atqaryp jatyrmyz. О́tken oqý jylynda mektep bitirgen 69 túlektiń 39-y memlekettik grant jeńip aldy. Qazaqstan boıynsha UBT-dan eń joǵary ball alǵan shákirtter qatarynda 137 ball jınaǵan bizdiń Anjelıka Stepanıda bar. Mektebimiz jańa, 2015 jyly paıdalanýǵa berilgen. Barlyq kabınetimiz ınteraktıvti taqtamen, tıisti qural-jabdyqpen qamtylǵan, mamandar jetkilikti. Memleket barlyq jaǵdaıdy jasap otyr. Árıne, aýdanymyzda jańa mektep salynyp, oqýshylar bólinetin bolsa, múmkindigimiz kóbeıe túseri sózsiz, - deıdi №47 mektep dırektory Natalıa Erǵojıeva.
Qazbek QUTTYMURATULY,
«Egemen Qazaqstan»
Batys Qazaqstan
Sýretti túsirgen Nazgúl QOJANBAEVA