Londonda «Azııa úıi» shtab-páterinde Qazaqstan Respýblıkasynyń Prezıdenti Nursultan Nazarbaevtyń aǵylshyn tilindegi «Táýelsizdik dáýiri» kitabynyń tusaýkeser rásimi ótti, dep habarlaıdy Elbasy Qorynyń baspasóz qyzmeti.
Is-sharany QR Tuńǵysh Prezıdenti Qory jáne Qazaqstan Respýblıkasynyń Ulybrıtanııa Birikken Koroldigindegi jáne Soltústik Irlandııadaǵy Elshiligi uıymdastyrdy.
Memleket Basshysy kitabynyń tusaýkeseri ústimizdegi jylǵy kóktemde Qordyń bastamasymen Reseı Federasııasynda - Máskeý jáne Sankt-Peterbýrg qalalarynda ótti.
Tarıhı kitaptyń tusaýkeser rásimin Londonda QR Tuńǵysh Prezıdenti - Elbasy Qorynyń atqarýshy dırektorynyń orynbasary Igor Rogov ótkizdi. Is-sharaǵa "Parlamentarılerdiń qarýsyzdaný men ıadrolyq qarýdy taratpaý qozǵalysynyń" teń tóraǵasy, baronessa Sıýzan Mıller, Qazaqstan-Brıtan Qoǵamynyń tóraǵasy Rýpert Gýdman, Ulybrıtanııa Parlamentiniń depýtattary, qoǵamdyq qaıratkerler, dıplomatııalyq korpýstyń ókilderi qatysty.
"Qazaqstan Prezıdentiniń osy shyǵarmashylyq eńbegi árbir qazaqstandyq úshin óte jaqyn, óıtkeni elimizdiń táýelsiz memleket retinde qalyptasýy jyldaryn kórsetedi. Kitapta elimizde bolǵan kúrdeli úrdiske, betburysty sátterge tereń taldaý jasalǵan. Sonymen qatar, onda Respýblıkanyń aldynda turǵan jańa mindetter beınelengen. Osynyń barlyǵy kitapty naǵyz tarıhı qujat retinde kórsetedi. Onyń qundylyǵy osynda", - dedi QR Tuńǵysh Prezıdenti - Elbasy Qorynyń atqarýshy dırektorynyń orynbasary Igor Rogov.
Onyń aıtýynsha "Táýelsizdik dáýiri" kitaby jastar úshin erekshe paıdaly.
"Egemendik jyldary qazaqstandyqtardyń erkin, belsendi, ashyq jańa býyny keldi. Bolashaqtyń irgetasyn qalaý úshin onyń qaınar kózin, óziniń tarıhyn bilý kerek. Eldiń bıiktikke qalaı qol jetkizgenin, qandaı syn-tegeýrinderdi eńsergenin túsinýi óte mańyzdy bolyp tabylady", - dedi Igor Rogov.
Qor Memleket Basshysy kitabynyń tusaýkeserin shetelde uıymdastyrýdy jalǵastyrady, kezdesýler Berlınde, Parıjde, sondaı-aq Brazılııada ótedi.
Baronessa Sıýzen Mıller Qazaqstannyń ıadrolyq qarýsyz álem qalyptastyrýdaǵy naqty qadamdaryn atap ótti.
"Táýelsizdiktiń qysqa merziminde Qazaqstan aıtarlyqtaı jetistikterge qol jetkizdi. Táýelsizdik jarııalanǵanǵa deıin de 1989 jyly Qazaqstan álemde tuńǵysh bolyp synaq polıgonyn jabý úshin ıadrolyq synaqtarǵa qarsy halyqaralyq qozǵalysqa jol ashty", - dedi Baronessa Sıýzen Mıller.
Kezdesý barysynda tanymal brıtandyq rejısser Andre Sıngerdiń Semeı ıadrolyq polıgonyndaǵy synaqtardyń saldary jáne ıadrolyq qarýsyz álem qozǵalysy týraly "Jel turǵanda" atty derekti fılmi kórsetildi.