Kúı atasy Qurmanǵazy Saǵyrbaıulyna arnalǵan ult-aspaptar orkestrleriniń halyqaralyq festıvali bastaldy. Qyrǵyzstan, О́zbekstan, Reseı memleketterinen jáne elimizdiń barlyq aımaqtarynan kelgen dombyrashylar aldymen oblys ortalyǵyndaǵy Qurmanǵazy eskertkishine baryp, gúl shoqtaryn qoıdy.
О́ner merekesine 15 orkestr ujymy qatysýda. Shara shymyldyǵyn Atyraýdaǵy Dına Nurpeıisova atyndaǵy akademııalyq ult aspaptar orkestri ashty. Odan keıin sahnaǵa kóterilgen kókshetaýlyq K.Kúmisbekov atyndaǵy ult aspaptar orkestri, aqtóbelik A.Jubanov atyndaǵy ult aspaptar orkestri, Pavlodardan kelgen R.Omarov atyndaǵy ult aspaptar orkestriniń ónerin Qyrǵyzstannan kelgen qonaqtar «Mólmól» qomyzshylar ansambli jalǵady. Reseıdiń «Skıf» kvarteti, Aqtaý, Qostanaı, Astana qalalarynan kelgen óner ujymdary da Qurmanǵazy kúılerin oryndap, kórermen qoshemetine bólendi.
О́zbekstannyń «Sogdıana» halyq aspaptar orkestri, atyraýlyq «Naryn», Almatydan kelgen Qurmanǵazy atyndaǵy memlekettik akademııalyq ult aspaptar orkestri festıvaldiń ekinshi kúninde óner kórsetip, Jaıyq jaǵasynda qudiretti kúı óneri saltanat qurdy. Bul qatarda taldyqorǵandyq M.Tólebaev atyndaǵy, oraldyq Dáýletkereı atyndaǵy, qyzylordalyq Turmaǵambet atyndaǵy halyq aspaptary orkestrleri de bar.
Halyqaralyq festıvalge qatysýshy orkestrlerdiń sherýi jáne marapattaý saltanaty erteń, 24 qazanda H.Dosmuhamedov atyndaǵy Atyraý memlekettik ýnıversıtetiniń «Jaıyq» sport-mádenı kesheninde ótedi.
Astana qalasy Memlekettik akademııalyq fılarmonııasy qazaq orkestriniń kórkemdik jetekshisi, Atyraý oblysynyń Qurmetti azamaty Aıtqalı Jaıymov: «Atyraý topyraǵynda dombyra ustaǵan dúldúlderdiń bas qosýy – Qurmanǵazy babamyzdyń ulylyǵyna qurmet. Dombyrashylar qaı jerde bas qossa da, Qurmanǵazynyń kúıi kúmbirleıdi. Bul da óner qudireti», - deıdi.
Baqytgúl BABASh,
«Egemen Qazaqstan».
ATYRAÝ