Qaraǵandy oblysynyń tilderdi damytý jónindegi basqarmasy «TÚRKSOI» túrki mádenıetin jáne ónerin damytý halyqaralyq uıymy, Ahmet Baıtursynuly atyndaǵy Til bilimi ınstıtýty, Halyqaralyq «Qazaq tili» qoǵamy jáne Halyqaralyq Túrki akademııasymen birlese ulttyq termın jasaý isiniń tarlanbozy, ǵalym, aýdarmashy, jazýshy Islám Jarylǵapovtyń 100 jyldyq mereıtoıyna arnalǵan «Qazaq sózjasamy: tarıhy, búgini, keleshegi» atty halyqaralyq ǵylymı-tájirıbelik konferensııa ótkizdi.
Konferensııa jumysyn oblys ákimi Erlan Qoshanov ashyp, júrgizip otyrdy.
Arqa tósindegi alqaly jıynǵa baýyrlas Túrkııa, Ázirbaıjan, Qyrǵyzstan elderiniń jáne respýblıkamyzdyń til taný ǵylymynyń esimderi keńinen tanymal mamandary, ádebıettanýshylary, tarıhshylary, halyqaralyq uıymdardyń basshylary, belgili qoǵam qaıratkerleri, til janashyrlary, joǵary oqý oryndarynyń professorlary, oqytýshylar, magıstranttar, stýdentter, jergilikti atqarýshy organdardyń ókilderi qatysty.
Mártebeli meımandar arasynda Halyqaralyq «TÚRKSOI» túrki mádenıeti men ónerin damytý uıymynyń Bas xatshysy Dúısen Qaseıinov, Halyqaralyq Túrki akademııasynyń prezıdenti, tarıh ǵylymdarynyń doktory, professor Darhan Qydyráli, Qazaqstan Respýblıkasy Bilim jáne ǵylym mınıstrliginiń Axmet Baıtursynuly atyndaǵy Til bilimi ınstıtýtynyń dırektory, Ulttyq ǵylym akademııasynyń korrespondent-múshesi, fılologııa ǵylymdarynyń doktory, professor Erden Qajybek, Qazaqstan Respýblıkasy Bilim jáne ǵylym mınıstrliginiń Axmet Baıtursynuly atyndaǵy Til bilimi ınstıtýtynyń bas ǵylymı qyzmetkeri, Ulttyq ǵylym akademııasynyń akademıgi, fılologııa ǵylymdarynyń doktory, professor О́mirzaq Aıtbaıuly boldy.
Sonymen qatar, konferensııada Ankara qalasynyń Gazı ýnıversıtetiniń professory, Túrkitaný ortalyǵynyń dırektory, fılologııa ǵylymdarynyń doktory Hýlııa Kasapoglý Chengel, Qyrǵyzstannan Halyqaralyq Túrki akademııasynyń bas ǵylymı qyzmetkeri, professor Qadyraly Qonqobaı, Ázirbaıjan memlekettik pedagogıkalyq ýnıversıtetiniń professory, fılologııa fakýltetiniń dekany, fılologııa ǵylymdarynyń doktory Býlýdhan Azızoglý Halılov mazmundy baıandama jasady.
Konferensııanyń sońyna taman Halyqaralyq «TÚRKSOI» túrki mádenıeti men ónerin damytý uıymynyń Bas xatshysy Dúısen Qaseıinov túrki dúnıesi men ult rýhanııatyna sińirgen eńbegi úshin bir top ǵalymdy arnaıy medalmen marapattady. Olardyń arasynda Halyqaralyq Túrki akademııasynyń prezıdenti, «Egemen Qazaqstan» gazetiniń basshysy Darhan Qydyráli de boldy.
Jıyn sońynda Islám Jarylǵapovtyń aǵaıyny, Qaraǵandy oblystyq máslıhatynyń depýtaty Ǵazym Jarylǵapov konferensııaǵa qatysýshylarǵa áýlet atynan alǵys aıtty.
Qaırat ÁBILDA,
«Egemen Qazaqstan»
Qaraǵandy