Joǵarǵy sot keńesiniń janyndaǵy biliktilik komıssııasy ótkizgen emtıhannyń qorytyndysy jarııalandy. Emtıhan qorytyndysy týraly Joǵarǵy sottyń sýdıasy, Joǵary sot keńesiniń múshesi, Joǵarǵy sot keńesiniń janyndaǵy biliktilik komıssııasynyń tóraǵasy Ádil Quryqbaev aıtyp berdi.
«Joǵarǵy sot keńesiniń jumysyn modernızasııalaý, jańǵyrtý baǵytynda kóptegen jumystar atqaryldy. Birinshiden, sotta máseleniń bárin kadr sheshedi. Al kadrdy biz qaıdan alyp jatyrmyz? Kadrlardy Joǵarǵy sot, álbette, respýblıkamyzdyń zańgerlerinen jınaıdy. Qazaqstannyń búgingi kúngi zań talabyna sáıkes, jasy otyzǵa tolǵan, zań turǵysynda joǵary bilimi bar jáne moraldyq adamgershilik qasıetteri minsiz bedeli bar, onyń ústine on jyldan astam ýaqyt zań salasyndaǵy jumys ótili bar adamdar sýdıa qyzmetine ózderin ózderi usyna alady. Búgingi kúni biz kadr máselesin retteý baǵytynda Joǵarǵy sot júıesine keleıin dep jatqan úmitkerlerdi irikteýdi jańa ádispen, jańa tártippen júrgize bastaǵanymyzdy jetkizgimiz keledi», - deıdi Ádil Quryqbaev Joǵary sot keńesinde tilshilerdiń suraǵyna jaýap bere otyryp. Onyń aıtýynsha, jańa ádistiń qorytyndysy boıynsha eki qaıtara biliktilikti qabyldaý emtıhany ótkizilgen.
«Birinshi satysy osy jyldyń qyrkúıek aıynda ótkizildi. Ol kezde biz 70 adamdy úmitker retinde shaqyrdyq. Úmitker retinde shaqyrylǵan osy 70 adamnyń alpysy kelip, eń birinshi satysy bolyp esepteletin psıhologııalyq testileýden ótti. Psıhologııalyq testileýdi biz jańa tehnologııalarmen, ózimizdiń mentalıtettik qasıetimizdi esepke alyp, qazaq halqynyń boıyndaǵy qasıetterdi esepteı otyryp jáne qandaı adam sot bola alady degen metodologııalyq ádister negizinde ótkizdik. Alǵashqy 60 adamnyń psıhologııalyq testten 23-i ótti. Al odan psıhologııalyq testileýden ótken úmitkerler esse retinde óz oılaryn qysqa jazatyn bolady. Esseden keıin ol 11 zań salasyna baılanysty kompıýterlik testileýden ótedi. Osy kompıýterlik testileýge 23 adamnyń 17-i tilek bildirgen. Onyń 17-niń bar-joǵy úsheýi ǵana kerekti ball jınap, biliktilik emtıhanynan ótti dep eseptelindi», - deıdi ol. Ádil Quryqbaev óz sózinde atap ótkendeı, synnan súrinbeı ótken úsh adam taǵy aýyzsha emtıhan tapsyrady. Aýyzsha emtıhan negizinen úsh quqyqtyq sıpatta jasalǵan esepterdi jasaýdan turady. «Esepterdi sheshýde úmitker neni bilýi kerek? Iаǵnı, úmitker osy quqyqtyq jaǵdaıdyń qandaı zańmen sheshiletinin aıqyndap, dálelderin keltirgen jaǵdaıda synnan ótedi. Úmitker aýyzsha emtıhan tapsyrý úshin eki saǵattyń ishinde ol bizge quqyqtyq eseptiń jaýabyn jazbasha túrde alyp kelip, biz komıssııa músheleri jaýaptaryn jarty saǵattyń ishinde tekserip qarap shyǵyp, odan keıin úmitkerdi áńgimelesýge shaqyramyz. Buryn tapsyrylǵan emtıhan kezinde bul synnan iriktelgen úsh adamnyń ekeýi ótip, bireýi ótpeı qalǵan bolatyn», - deıdi Ádil Quryqbaev. Ádil Quryqbaevtyń aıtýynsha, komıssııa quramynda 16 adam bar. Úmitkerler sýdıa ataný úshin QR Joǵarǵy sotyna kelip, emtıhan tapsyrýǵa baryn salýy kerek. «Sońǵy ret (osy aıda - avt.) emtıhannan ótýge 50 adam ótinish bildirip, olardyń 40-y psıhologııalyq testileýden ótýge ótinish bildirdi. Odan 17-i adam ótip, olardyń 14-i kompıýterlik testileýge kelgen. Búgin barlyq synnan súrinbeı, sýdıalyqqa úmitkerlerdiń úsheýi ǵana ótip otyr», - dep túıdi Ádil Quryqbaev.