Búgin - halqynyń kórikti keleshegi úshin syrly sózimen de, baıandy isimen de barynsha kúresken, «elim» dep eńirep ótken ardager aqyn Sultanmahmuh Toraıǵyrovtyń týǵan kúni.
Aqynnyń ulan-ǵaıyr ádebı murasy ony qazaq ádebıetiniń klassıkteri kataryna kosty. Kúrmeýi qıyn qystalań zamanda nebári jıyrma jeti-aq jyl ǵumyr keshken aqynnyń osynshama eńbek kaldyrýy, shyǵarmalaryndaǵy ultjandylyq rýhtyń kúshtiligi, ultynyń baqytty bolashaǵy jolyndaǵy qaıtpas kúreskerligi, azamattyq arynyń bıiktigi, darynynyń darkandyǵy tań qaldyrady.
Sultanmahmut Toraıǵyrov 1893 jyldyń 28 qazany kúni Soltústik Qazaqstan oblysynyń Ýálıhanov aýdanynda týǵan. 3 jasynda sheshesi qaıtys bolyp, 6 jasyna deıin ájesiniń tárbıesinde bolǵan. Keıin ákesi eki ulymen Baıanaýylǵa kóship, Toraıǵyr kentine taıaý jerge qonystanǵan. Toraıǵyrov alǵash ákesinen eskishe hat tanyp, 13 jasynan Muqan, Ábdirahman, Tortaı degen moldalardan dáris aldy.
1911 jyly jańasha oqyǵan Nuraly ustazynyń kómegimen qazaq, tatar tilderindegi ádebı kitaptarmen, gazet-jýrnaldarmen tanysady. 1912 jyly Troıskidegi Ahýn Rahmanqulı medresesine túsedi, biraq munda bir jyldaı oqyǵan ol ókpe aýrýynyń zardabynan oqýdan shyǵyp qalady. Toraıǵyrov endi medresede oqýdy qoıyp, oryssha oqý izdeıdi, qala mańyndaǵy elde jaz boıy bala oqytady. Osy kezden aqyndyqqa den qoıyp, «Oqyp júrgen jastarǵa», «Tálipterge» («Shákirtterge»), «Endigi betalys», «Oqýdaǵy maqsat ne?», «Anaý-mynaý», «Maǵynasyz meshit», «Jarlaý», «Dosyma hat», «Shyǵamyn tiri bolsam adam bolyp», «Túsimde», «Jazǵy qaıǵy», «Qymyz», «Keshegi tús pen búgingi is», t.b. óleńderin, «Zarlandym» atty uzaq ocherkin jazdy. Osy tusta «Qamar sulý» romanyn jazýdy bastaǵan.