Halyqaralyq deńgeıdegi áýejaı qoldanysqa berildi

«Úshinshi» dep te atalatyn jańa keshen álemdegi eń úl­ken áýejaılardyń qatarynan kórinýge úmitker. Ashylý saltanatyna Túrkııa Prezıdenti Rejep Taııp Erdoǵan qatysty. 

Ystanbuldyń Eýropa bóligin­degi Arnaýytkóı aýdanynda, Dýrýsý kóline jaqyn ornalasqan jańa áýejaıdan kókke kóterilgen alǵashqy ushaq Ankara qalasyna bet aldy. Al birinshi halyqaralyq reıs Soltústik Kıpr Túrik Res­pýblıkasyna jasalmaq. Odan keıin Ázerbaıjanǵa reıs ashylýy josparlanǵan. 

Jylyna 150 mıllıon jolaý­shyǵa qyzmet kórsete alatyn áýe­­jaıdyń jalpy quny – 11,7 mıl­­lıard AQSh dollary. Ony «Lımak», «Kolın», «Djengız», «Mapa» kompanııalarynyń 200 myń jumysshysy 42 aı boıy salǵan-dy. 

Jalpy aýmaǵy 76,5 mıllıon sharshy metr bolatyn keshenniń alǵashqy kezeńine 10 mıllıard eýro jumsalǵan. Áýe alańynyń qalǵan bóligi qoldanysqa 2023 jylǵa deıin berilmek. Áýejaıda 6 ushý-qoný jolaǵy, 500 ushaq turaǵy, 70 myń avtokólik qabyl­daı alatyn ashyq jáne jabyq avtoturaq bar. 

Jyl sońyna deıin áýe­jaı­da 2000 ushaq qabylda­nyp, álemniń 350-den astam núktesine jolaýshy attandyrý josparlanǵan. Yeni havalimanı álemniń 250 áýe kompanııasyna qyzmet kórsetedi. Airbus A380 pen Boeing 747-8 sekildi sońǵy úlgidegi ushaqtardy qıyndyqsyz qabyldaı alady. Sondaı-aq robot, jasandy ıntellekt arqyly adam taný, aqyldy júıe, kabelsiz ınternet, SIM kartasyz GSM qoljetimdiligi sekildi birqatar zama­naýı tehnologııanyń qol­dany­lýyna múmkindik bar. Jolaýshylarynyń qaýipsizdigi úshin 3500 kúzet qyzmetkeri men 9000 beınebaqylaý kamerasy jumys isteıdi.

Ystanbulda budan basqa «Atatúrk», «Sabıha Gókchen» atyndaǵy áýejaılar bar. Jańa áýejaı men Atatúrk áýejaıynyń arasy – 35 kılometr. 2018 jyldyń sońyna deıin «Atatúrk» áýejaıy toly­ǵymen jańa áýejaıǵa kóshi­riledi dep josparlanǵan. Ázirge jańa áýejaı konstrýksııasy tolyǵymen aıaqtalmaıynsha, «Atatúrk» áýejaıy jumysyn jalǵastyra bermek. Jańa áýejaı alańy Ystanbul metrosynyń M2, Marmaraı jelisimen baılanysady.

Svetlana ǴALYMJANQYZY,

«Egemen Qazaqstan»