Almaty ákimdiginde qala aıaldamalarynda qoǵamdyq kólik qozǵalysynyń kestesin kórsetetin elektrondy tablolardyń qashan paıda bolatyny týraly aıtyldy. Qala ákimiminiń baspasóz qyzmetinen habarlaǵanyndaı, ákimdik aıaldamalarǵa sıfrly tablolar ornatýǵa qarsy emes.
«Munda olardy qala bıýdjetinen tys qarjy esebinen ornatý týraly aıtyldy. Alǵashqy tablo Tımırıazev kóshesi boıyndaǵy BRT jelisinde jyl sońyna deıin paıda bolady. Bul isti Kólik holdıngi óz moınyna alyp otyr. Megapolıs ákiminiń tapsyrmasyna oraı biz bul isti bıýdjetten tys qarjy esebinen oryndaımyz jáne qalanyń iri toraptyq aıaldamalaryn sıfrly tablolarmen qamtamasyz etemiz», - dedi Jolaýshylar kóligi jáne avtomobıl joldary basqarmasynyń basshysy Talǵat Hoschanov. - 200 myńnan astam tutynýshy onlaın-rejımde karta boıynsha kólik qozǵalysyn «Ońaı» qosymshasyndaǵy QR-kody arqyly biledi. 360 myń belsendi qoldaýnshy CityBus qosymshasyn paıdalanýda.
Jyl aıaǵyna deıin ár aıaldamaǵa qoǵamdyq kólik baǵytynyń nómiri, jumys ýaqyty kórsetilgen belsendi aqparat ilinedi.
Aıta keterligi, jyl aıaǵyna deıin Almatyda jańa qoǵamdyq kóliktiń úlesi 87 paıyzǵa deıin jetetin bolady. О́tken aptada qalaǵa taǵy 200 jańa avtobýs kelgendigi belgili.
Qala ákimi Baýyrjan Baıbektiń aıtýynsha, eski ári tútin shyǵaratyn avtobýstar qalada júrýi tıis emes. Eger kórsetilgen qoldaýǵa qaramastan jeke tasymaldaýshy jyljymaly sostavty jańalamasa, onda olarmen kelisim buzylady. Jańa tehnologııalardy engizip, bolashaqta bir kólikten ekinshisine tegin aýysýdy qarastyrǵan jón. Jolaýshylardyń kólik jumysyna qanaǵattanýy – tasymaldaýdyń basty krıterııi. Jeke kólikti qazirgi deńgeıde ustap turý úshin laıyqty balama usyný qajet.
Elvıra Serikqyzy,
«Egemen Qazaqstan»
ALMATY