Almaty qalalyq Jumyspen qamtý jáne áleýmettik baǵdarlamalar basqarmasy Almaty qalasynda tirkelgen ári az qamtylǵan otbasylardy áleýmettik qorǵaý maqsatynda kórsetiletin kómek túrleri jaıynda keńinen maǵulmat alyp, der kezinde habardar bolyp otyrýǵa shaqyrady.
Osy oraıda Almaty qalalyq Jumyspen qamtý jáne áleýmettik baǵdarlamalar basqarmasy basshynyń orynbasary Aınur Muqajanova kórsetiletin 14 kómek túrine toqtalyp, basqarma tarapynan atqarylyp otyrǵan birqatar sharalarǵa atap ótti.
Memleket Basshysynyń «Bes ınstıtýsıonaldyq reformany júzege asyrý boıynsha 100 naqty qadam» tapsyrmasyna sáıkes aǵymdaǵy jyldyń 1 qańtarynan bastap memlekettik ataýly áleýmettik kómek – jańa nusqada kórsetiledi.
Jan basyna shaqqandaǵy ortasha tabysy kedeılik sheginen aspaıtyn (Almaty qalasy boıynsha 15 919 teńgeni quraıdy) azamattarǵa jańa nysandaǵy AÁK kórsetiledi. Kedeılik shegi eń tómengi kúnkóris deńgeıiniń 50 paıyzyn quraıdy jáne ár toqsanǵa esepteledi. Bıylǵy jyldyń IV toqsanyna kúnkóris deńgeıiniń kólemi 31 838 teńgeni quraıdy.
AÁK shartsyz jáne shartty aqshalaı eki túri qarastyrylǵan.
AÁK-ti taǵaıyndaý úshin Almaty qalalyq Halyqty jumyspen qamtý ortalyǵyna baryp ótinish bildirý qajet. Munda ótinish bildirýshige túsinikteme berip, qajet bolǵan jaǵdaıda áleýmettik beıimdeý sharalaryn usynady.
AÁK-ti resimdeý úshin ótinish berýshi belgilengen úlgide ótinish beredi jáne mynadaı qujattardy tirkeýi qajet:
otbasy quramy týraly málimetter;
adamnyń (ótinish berýshiniń otbasy músheleriniń) tapqan tabysy týraly málimetter;
jeke qosalqy sharýashylyǵynyń bar-joǵy týraly málimetter;
jumyspen qamtýǵa járdemdesýdiń belsendi sharalaryna qatysqan jaǵdaıda, áleýmettik kelisimsharttyń kóshirmesi;
ótinish berýshiniń (otbasy músheleriniń) turǵylyqty jeri boıynsha tirkelgenin rastaıtyn qujattyń kóshirmesi.
Aǵymdaǵy jyldyń 9 aıynda 491 otbasyna (2 387 adamǵa) 100 mln teńge mólsherinde AÁK taǵaıyndalǵan. Onyń ishindegi 54 jumyssyzdyń 50-i turaqty jáne ýaqytsha jumys oryndaryna, 4-ýi kásiptik oqytý kýrstaryna jiberildi.
AÁK baǵdarlamasy sheginde az qamtylǵan azamattarǵa ataýly áleýmettik kómek alý múmkindigi, jumysqa ornalastyrý maqsatynda tegin kásiptik oqytý men qaıta oqytý jáne bıznes-jobalaryn júrgizip júrgen nemese josparlap júrgen jumyssyzdar úshin shaǵyn nesıe alý múmkindigi bar.
AÁK-tiń osyndaı qoldaý túrleri az qamtylǵan otbasylarǵa materıaldyq jaǵdaılaryn jaqsartýǵa yqpal etedi, onyń nátıjesinde otbasynyń tabysy turaqtalady, eńbek naryǵynda beıimdelý múmkindigi paıda bolady.
Almaty qalalyq Jumyspen qamtý jáne áleýmettik baǵdarlamalar basqarmasynyń áleýmettik tólemder bóliminiń bas mamany Muratbek Seınasınovtyń aıtýynsha, qala turǵyndaryn sıfrlik efırlik teleradıo habarlaryn taratýǵa tolyq kóshirý maqsatynda sıfrlyq teleradıo sıgnalyn qabyldaý múmkindigimen qamtamasyz etýge oraı maqsatynda QR Úkimetiniń 2016 jylǵy 8 qarashadaǵy №677 qaýlysyna sáıkes televızııalyq abonenttik jalǵamalarmen qamtamasyz etý (jetkizý jáne ornatý) kerektigi aıtylǵan. Jalǵamalarmen qamtamasyz etý birjolǵy bolyp tabylady ári birge turatyn otbasynyń basqa múshelerine berilmeıdi.
Búgingi tańda, ataýly áleýmettik kómek 491 otbasyna taǵaıyndalǵan, onyń ishinde 133-ine jalǵamalar ornatylǵan.
Jalǵamalardy alý úshin tirkelgen turǵylyqty meken-jaıy boıynsha Almaty qalalyq Jumyspen qamtý jáne áleýmettik baǵdarlamalar basqarmasynyń aýdandyq bólimderine kelesi meken-jaılarǵa ótinish bildirýge bolady.
Alataý aýdany: Shańyraq 2-yqshamaýdany, Janqoja batyr kóshesi, 26 úı, tel.: 3953605;
Almaly aýdany: Seıfýllın dańǵyly, 577, tel.:261-02-81;
Áýezov aýdany: 3-yqshamaýdan, Abaı dańǵyly, 41-a, tel.: 276-49-92;
Bostandyq aýdany: Jandosov kóshesi, 2 úı, tel.: 392-22-95;
Jetisý aýdany: Maqataev kóshesi, 142 úı, tel.:279-37-72;
Medeý aýdany: Tóle bı kóshesi, 12 úı, tel.: 291-06-65;
Naýryzbaı aýdany: Qalqaman yqshamaýdany, 24 úı, tel.: 383-55-82;
Túrksib aýdany: Rıhard Zorge kóshesi, 18 úı, tel.: 234-93-15.
Elvıra SERIKQYZY,
«Egemen Qazaqstan»
ALMATY