Jyl sońyna deıin astanalyqtarǵa 364 páter beriledi

Baspasóz týry barysynda bank qyzmetkerleri jańadan salynǵan turǵyn úılerdi jýrnalısterge kór­setip, onyń qandaı jolmen beriletinin túsindirdi. Jańa páter ıeleri konkýrs negizinde anyqtalmaq. Konkýrsqa atal­ǵan banktiń kez kelgen salymshysy qatysa alady. Páterdiń tolyq baǵasynyń 20 %-na teń bastapqy jar­nasyn úsh jyl boıy jınaǵan salym­shylardyń 2018 jyldyń 6 qarashasyna deıin ótinish tapsyrýǵa múmkindigi bar. Konkýrs nátıjesi 7 qarashada belgili bolady. 

364 páterdiń jartysy «Turǵyn úı qurylys jınaq bankiniń» salymshy­laryna berilse, qalǵan jartysy As­tana qalasy ákimdiginde kezekte tur­ǵan azamattarǵa tabystalady. To­lyq árlengen páterlerdiń 1 sharshy metriniń quny – 180 myń teńge. Bul naryqtyq baǵadan eki esedeı tómen. 

Jańa keshen 37-40 sharshy metr bolatyn 1 bólmeli – 75 páterden, 2 ból­meli – 168, 3 bólmeli 121 páterden tu­rady. Ár úıdiń birinshi qabatynda bala­larǵa arnalǵan ortalyqtar bar, keshen janynan mektep salynyp jatqanyn da baıqadyq. 

«Turǵyn úı qurylys jınaq ban­­kiniń» ortalyq fılıalynyń dırek­­to­ry Jansultan Mataevtyń aıtýyn­­sha, jyl saıyn baǵdarlamaǵa qyzy­ǵý­­shy­lyq tanytýshylar qatary ósip keledi. 

– Turǵyn úı qurylys jınaq júıesi qatysýshylarynyń úlesi 2015 jyly 7,1% deńgeıinde bolsa, qazir 13,1%-dy quraıdy. Qazir turǵyn úı qurylys jınaq júıesiniń qoldanýshylar sany 1,2 mıllıonǵa jetti. Bank azamattarǵa jyldyq mólsherlemesi 3,5-5% ara­ly­ǵynda zaım alýǵa múmkindik beredi. Respýblıka boıynsha banktiń jalpy jınaq somasy 562,3 mıllıard teń­geni quraıdy. Qoldanýshylar kór­set­kishi boıynsha Astana qalasy alda tur. Elorda turǵyndaryna tıesili «Tur­ǵyn úı qurylys jınaq banki» depo­zıt­teriniń sany – 170 771, – deıdi ol. 

Atalǵan bank «Nurly jer» memle­kettik turǵyn úı baǵdarlamasy aıasynda buǵan deıin Astana qalasy boıynsha 620 páter satqan. Jyl sońyna deıin bul kórsetkish 984-ke jetedi dep jos­parlap otyr. 2019 jyly memlekettik baǵdarlama aıasynda taǵy 1825 páter satylady dep kútilýde.

Svetlana ǴALYMJANQYZY,

«Egemen Qazaqstan»