2019 jyly tennısten ótetin Devıs kýbogynyń irikteý synynda Qazaqstan quramasy Portýgalııamen kezdesetini belgili. Al sol komanda jaıynda biz ne bilemiz?
Devıs kýbogy jolyndaǵy jarysta Portýgalııa quramasynyń jarytyp óner kórsetkeni esimizde joq. Qazirgi kezde de olardyń qarqyny kúshti dep aıta almaımyz. Aıtýly memleket ókilderi arasynda eń úzdik oıynshysy Joao Soýsa álemdik reıtıngte 48 oryndy ıelenýde. Bıyl ol AQSh-tyń ashyq birinshiliginde tórtinshi kezeńge shyqty. Ázirge 29 jastaǵy tennısshiniń eń táýir nátıjesi osy. Pıreneı túbeginiń odan keıingi úzdigi 30 jastaǵy Pedro Soýsa. ATR tiziminde ol 124 satyǵa jaıǵasty. Qalǵandary «TOP-200» oıynshynyń qataryna da enbegen.
Portýgalııaǵa qaraǵanda Qazaqstan quramasynyń qarqyny áldeqaıda shıraq. Bizdiń jigitter 2011-2018 jyldar aralyǵynda aıtýly jarysta bes ret shırek fınalǵa shyqty. Elimizdiń birinshi raketkasy Mıhaıl Kýkýshkın álemdik reıtıngte 54 orynda tur. Aleksandr Nedovesov (№241), Aleksandr Býblık (№248) jáne Denıs Evseev (№297) syndy oıynshylar qalyń toptyń arasynda júrgenimen, olar komandalyq saıysta óte sheber oınaıdy. Olar bolsa, kelesi jyldyń 1-2 aqpan kúnderi Astanada ótetin básekede jerlesterimiz óz jankúıerlerin qýantýǵa tıis.
Ǵalym SÚLEIMEN,
«Egemen Qazaqstan»