Májiliste Oral Muhamedjanovty eske alýǵa arnalǵan konferensııa ótti

Is-shara O.Muhamedjanov­tyń týǵa­nyna 70 jyl tolýyna oraı uıymdastyryldy. Oǵan Máji­lis Tóraǵasy Nur­lan Nyǵ­­ma­tý­lın, Parlament depý­tat­ta­ry, qoǵam qaıratkerleri, O.Muha­med­janovtyń jary Shol­­pan Ǵalym­janqyzy, otbasy múshe­leri, týǵan-týys­tary jáne jaqyn­dary qa­tysty. 

Aldymen jınalǵandar Oral Baıǵonysulynyń ómiri men qyzmetine arnalǵan foto­kór­meniń ashylýyna kýá boldy. 

O.Muhamedjanov oblys­tyq tutynýshylar odaǵynan bas­tap, komsomol jáne partııa­ uıymdarynda, aýyldyq ákim­shi­likterde, sonymen birge ob­lystyq halyq depýtattary keńesinde basshylyq qyzmet­terde boldy. Joǵarǵy keńeske de depýtat bolyp saılandy. Keıin Úkimet apparatynda, Prezıdent Ákimshiliginde kóp jyldar jaýapty qyzmetter at­­­qardy. Sodan soń, 9 jyl boıy ómiriniń sońǵy kún­de­rine deıin Parlament Máji­lisiniń eki ret tóraǵasy, depýtaty bolyp elge, halyqqa qyzmet etti. Eks-spı­ker­diń osy jyldardaǵy ómiri­niń eń jarqyn sátteri arnaıy kórmedegi fotosýretter ar­qy­ly baıandalyp turdy. 

O.Muhamedjanov kózi tiri­sinde «Qurmet», «Parasat», Dos­tyq (RF), «Sodrýjestvo» (TMD PAA) ordenderimen ma­rapat­talǵan. 

Eske alý konferensııasyn Májilis depýtaty Nur­taı Sa­bılıanov júrgiz­di. Ol al­ǵash­qy sózdi Má­ji­lis Tór­aǵasy Nurlan Nyǵmatýlın­ge berdi.

Májilis Tóraǵasy óz­ só­zin­de 2013 jyly ómir­­den oz­ǵan memleket jáne qoǵam qaı­ratker O.Muhamedjanov­pen tanysqan sátin qyzmettes bolǵan kez­de­rin eske alyp, kórnekti tul­ǵa­­nyń kisilik, adamgershilik qa­sıetterine toqtaldy.

– Oral Baıǵonysulynyń óziniń qyzmetin týǵan jeri – Qostanaı oblysynan bastap, ómiriniń sońyna deıin elim dep, jerim dep eńbek etti. Qa­zaqstanymyz egemendik al­ǵan birinshi kúnnen bastap, Elbasymyz Nursultan Ábishuly Nazarbaevtyń qa­synda bolyp, árqashanda Pre­zıdentimizdiń saıasatyn qoldap, elimizdiń damýyna úlken úles qosqan azamat edi. Elbasymyzdyń barlyq bastamalaryna belsene aralasyp, qaı jerde, qandaı qyzmet atqarsa da, iskerligimen, ja­ýap­­kershiligimen adamger­shi­lik jáne parasattylyq qa­sıetterimen tanyldy. Ár­qa­shan­da abyroıy joǵary, be­­deli bıik boldy, – dedi N.Nyǵmatýlın. 

Oral Baıǵonysulynyń jan-jaqty qabileti zor, maq­sat­qa berik, qyzmetke adal bolǵanyn alǵa tartqan Má­jilis Tóraǵasy onyń esimi elimiz tarıhynda, sonyń ishin­de Májilistiń tarıhynda máń­gi­lik saqtalatynyn aıtty. 

Oral Baıǵonysulynyń sóz­ge sheshendigi, zań shyǵarý­shy organnyń jumysyna qos­qan erekshe úlesi aıtyldy. 

Májilis Tóraǵasy­nyń­ só­zi­nen soń O.Muhamedjanov­tyń ǵumyrynan syr shertetin beı­ne­fılmniń kórsetilimi boldy. 

Sonymen qatar memleket jáne qoǵam qaıratkeri Oral­­­­baı Ábdikárimov, Se­nat Tór­aǵasynyń orynbasary Ser­geı Gromov, Qo­ǵam­dyq damý mınıstri Dar­han Kaletaev, IV shaqy­ry­lym­­­daǵy Májilis Tóraǵa­synyń orynbasary Vladı­mır Bobrov, Qostanaı oblys­tyq máslıhatynyń hat­sh­y­sy Saılaýbek Esjanov jáne basqalar Oral Baıǵonys­uly­nyń ǵıbratty ǵumyry men ónegeli eńbek jolyn erekshe tebirenispen baıandap berdi.

Serik ÁBDIBEK,

«Egemen Qazaqstan»