Qoǵamdyq damý mınıstrliginiń Qoǵamdyq kelisim komıteti 8-9 qarashada din máselelerine arnalǵan semınar uıymdastyrady. Eki kúnge sozylǵan sharada jalpy din salasyna qatysty oryn alǵan prosesster jaıynda sarapshylar pikir bildirip, eldegi dinı ahýaldyń mán-jaıy tóńireginde áńgime órbidi. Sonymen qatar, el ishindegi memlekettik-konfessııalyq qatynastar, din men zaıyrlylyq araqatynasynyń áleýmettik-mádenı kontekstindegi sıpaty, jáne de dinı ekstremızm men terrorızmge qarsy is-qımyl boıynsha memlekettik organdardyń atqaryp jatqan jumystary keńinen sóz boldy.
Semınarda Qoǵamdyq kelisim komıtetiniń Tóraǵa orynbasary Balǵabek Myrzaev din taqyrybynyń búgingi qoǵamda asa ózekti ekenin aıta kelip, teris aǵymdaǵy toptardyń óz qatarlastaryn toltyrý maqsatynda túrli áreketterge baryp jatqandyǵyn jetkizdi.
̶ Destrýktıvti dinı aǵymdar búgingi qoǵamda jastardy belsendi túrde qatarlaryna qosýǵa áreket qylýda. Sonymen qatar, áleýmettik álsiz toptardy da óz maqsattaryna paıdalanýǵa tyrysyp baǵady. Olardyń qoldanatyn keń taraǵan fýnksııalarynyń ishinde qaryzǵa aqsha berý arqyly, jumysqa ornalastyrý nemese áke-sheshesi, týǵan-týysy joq jandarǵa baýyrmaldyq tanytyp, jalǵa baspana berý arqyly óz toptaryna qosyp jatqanyn kózimiz kórip otyr. Teris dinı aǵym ókilderi kóp jaǵdaıda adamdardyń emosııasyna áser etý arqyly óz pıǵyldaryn júzege asyryp jatady,-dedi Qoǵamdyq kelisim komıtetiniń Tóraǵa orynbasary. Onyń aıtýynsha, teris aǵymdarmen kúresý úshin óńirlerdegi aqparattyq-túsindirý toptarynyń belsendi túrde jumys júrgizýi qajet. B. Myrzaev sonymen qatar, teris aǵym ókilderi áleýmettik jelilerde de óz úgit-nasıhattaryn belsendi túrde júrgizip otyrǵanyn aıtty.
̶ Bizdiń komıetet byltyr 6 myńnan astam áleýmettik paraqshaǵa saraptama júrgizip, onyń ishinde 2 myńnan astam paraqshaǵa «teris pıǵyldy» jazbalardy taratyp otyr degen baǵa berdi. Atalǵan parqshalarda jarııalanǵan postardyń mazmundarynda destrýktıvti aǵymdardyń kórinisi bar. Bul jazbalardy taratýshylardyń 50 paıyzy maqsatty túrde jumys júrgizse, onyń jartysy taratylǵan ýaǵyzdardyń teris aǵymdarǵa tıesili ekenin bilmeıtin bolyp shyqty,- dedi mınstrlik ókili. Osy rette, halyqqa túsindirý jumystaryn júrgizýdiń qanshalyqty mańyzdy ekenin atap ótti.
Atalǵan jıynda din salasyndaǵy ǵalymdar, dintanýshylar, teologtar aldaǵy ýaqytta dinı ahýaldy turaqtandyrý joldaryn josparlady.
Erkejan AITQAZY,
«Egemen Qazaqstan»