Týrızmdi damytýdyń jańa tásilderi men úrdisterine arnalǵan forýmda Qazaqstan Prezıdenti Nursultan Nazarbaev pen Reseı Federasııasynyń Prezıdenti Vladımır Pýtınniń qatysýymen birqatar mańyzdy qujattar qabyldandy.
Nursultan Nazarbaev is-sharaǵa qatysýshylarǵa arnaǵan sózinde forýmnyń tıimdi memleketaralyq alańǵa aınalǵanyn, Reseı Qazaqstannyń strategııalyq odaqtasy jáne mańyzdy saýda-ekonomıkalyq seriktesi bolyp tabylatynyn atap kórsetti.
«Búgingi forýmda óte ózekti jáne mańyzdy másele eki el arasyndaǵy týrızmi damytýdyń jańa tásilderi men aldaǵy perspektvalary qaralyp, talqylandy. Týrızm jahandyq ekonomıkalyq daǵdarys kezinde de ekonomıkanyń damý quraly sanalady. Qazaqstan men Reseı bul úderisterden shet qalmaýy tıis. Bizge jol ashylyp jatqan múmkindikterdi tıimdi paıdalaný kerek», dedi Memleket Basshysy.
Qazaqstan Prezıdenti forýmnyń ekijaqty óńiraralyq iskerlik qarym-qatynastarǵa jańa serpin berip, yntymaqtastyqtyń jańa kókjıegin ashatynyna senim bildirdi.
Alqaly bas qosý qorytyndysynda shekaralyq óńirlerdiń týrızmin damytý boıynsha mańyzdy sheshimder alynyp, úkimetaralyq birlesken qujattar men memorandýmdarǵa qol qoıyldy. Týrıstik jáne kóliktik-logıstıkalyq ınfraquylym is-qımyldaryn úılestirý, shekaralyq baqylaýdan kedergisiz ótý, qujattardy rásimdeýdi jeńildetý,Kaspıı áleýetin birlesip ıgerý, Baıqońyr ǵarysh aılaǵynda týrıstik klasterdi damytý sekildi keleli máseleler qamtyldy.
Eki tarap Qazaqstan men Reseı shekaralyq aımaqtarynda týrısterdiń qyzyǵýshylyǵyn týdyratyn júzden astam týrıstik marshrýtty birlesip júzege asyrýǵa kelisti.
О́mir ESQALI,
«Egemen Qazaqstan»
Soltústik Qazaqstan oblysy