Poshta operatory 2018 jyldyń basynda «Qazposhta qyzmetterin úshinshi tulǵalar arqyly kórsetý úshin franchaızıng modelin engizý» jobasyn bastaǵan bolatyn. Jobanyń basty maqsaty – halqymyzdy qoljetimdi jerden poshta qyzmetterimen qamtý, dep habarlaıdy Qazposhtanyń baspasóz qyzmeti.
Qazir poshta qyzmetterin shaǵyn jáne orta bıznes arqyly kórsetý seriktestik baǵdarlamasy Qazaqstannyń barlyq jerinde jumys isteıdi. Kompanııa jeke bıznespen aınalysatyn jergilikti kásipkerlermen yntymaqtastyq arqyly óz jelisin keńeıtýde.
Endi poshta bólimshelerine barmaı-aq sálemdemelerdi alýǵa nemese jiberýge, áýe jáne temirjol bıletterin satyp alýǵa, kommýnaldyq tólemderdi jáne salyqtardy tóleýge bolady. Kásipkerler dúkenderinde, janar-jaǵarmaı quıý stansııalarynda jáne basqa da jerlerde Qazposhtanyń qyzmetterin kórsetip, sonymen qatar óz taýarlaryn sata alady.
«Biz franchaızer - seriktesterimizge daıyn baǵdarlamany usynamyz, qyzmetkerlerin úıretip, uıymdastyrýshylyq jáne marketıngtik, sondaı-aq kóliktik-logıstıkalyq súıemeldeý jumystaryn kórsetemiz. Mundaı seriktestiktiń arqasynda shaǵyn jáne orta bıznester tabys tabýda, al Qazposhta óz jelisin keńeıtýde», dedi «Qazposhtanyń» kommersııalyq departamentiniń dırektory Zamıra Jumaǵul.
Búgingi kúni Qazaqstannyń barlyq qalalarynda Qazposhtanyń 111 franchaızer-seriktesteri jumysyn atqarady.
Anyqtama:
Franchaızıng – belgili bir kompanııa kelisimsharttyq qatynas arqyly belgili bir adamǵa, kompanııaǵa nemese uıymǵa óziniń ataýyn, onyń bedelin, ónimderi men qyzmetterin, marketıngtik tehnologııalardy, saraptamany jáne qoldaý mehanızmderin paıdalaný quqyǵyn beretin bıznes-uıym úlgisi.
Franchaızıngtik túrde kórsetiletin poshta qyzmetteri Shveısarııada, Úndistanda, Avstralııada, Kanadada jáne basqa elderde keńinen taraǵan. Eń jarqyn mysaldar - Ulybrıtanııa men Germanııanyń poshta bólimshesi. Royal Mail -dyń11 600 fılıaly bolsa, onyń 300-i ǵana kompanııaǵa tıesili, al Deutsche Post-tyń bir ǵana poshta bólimshesi bar, qalǵandary klassıkalyq franchaızıng modeli boıynsha jumys isteıdi. Osy poshtalardyń tájirıbesin Qazposhta da óz jumysynda qoldandy.