Parlament Senatynyń Tóraǵasy Qasym-Jomart Toqaev BUU-nyń Qazaqstandaǵy Turaqty úılestirýshisi Norımasa Shımomýrany qabyldady, dep habarlaıdy Senattyń baspasóz qyzmeti.
Q.Toqaev N.Shımomýrany BUU-nyń Qazaqstandaǵy qyzmetiniń 25 jyldyǵymen quttyqtady. Senat Tóraǵasy BUU-nyń jumysyna qatysý qazaqstandyq dıplomatııanyń basym baǵyty ekenin, óıtkeni ol Qazaqstanda ámbebap ári balamasyz álemdik uıym retinde qarastyrylatynyn aıtty. Áleýmettik-ekonomıkalyq damýǵa zor úlesi men reformalardy qoldaǵany úshin bizdiń elimizde BUU-ny qurmet tutady.
BUU reformalarynyń mańyzy týraly aıta kelip, Q.Toqaev Qazaqstan Bas hatshy A.Gýterrıshtiń tıisti bastamalary men sheshimderin qoldaıtynyn, ol BUU Bas Assambleıasynyń «BUU júıesi aıasynda damý maqsatynda jedel qyzmet salasyndaǵy saıasatty jan-jaqty tórt jyldyq sholý turǵysynda BUU damý júıesin qaıta baǵdarlaý» qararyna daýys berý kezinde kórinis tapqanyn atap ótti.
Júzdesýshiler BUU-nyń Qazaqstandaǵy ornyqty damý maqsattaryn iske asyrý taqyrybyn da qozǵady. Senat Tóraǵasy bizdiń elimizdegi barlyq qujattar Ornyqty damý maqsattaryna sáıkes keletinin, atap aıtqanda Prezıdent N.Nazarbaevtyń bastamasymen ázirlengen «Qazaqstan-2050» Strategııasy Ornyqty damý maqsattaryn tolyqtyratynyn eske saldy.
Qytaıdyń Qazaqstandaǵy Elshisi Chjan Sıaony onyń ótinishi boıynsha qabyldaı otyryp, Senat basshysy onyń Qazaqstandaǵy mıssııasynyń nátıjeli ári tabysty bastalýymen quttyqtady.
Q.Toqaev búginde strategııalyq áriptestik sıpatyna kóterilgen Qazaqstan men Qytaı qatynastarynyń qarqyndy damýyna rızashylyq bildirdi, ol eki eldiń memleket basshylarynyń eńbegi ekeni atalyp ótildi. Onyń pikirinshe, «Eki kórshi memlekettiń kóptarapty yntymaqtastyǵy men ózara tabysty is-qımylyn damytýda olardyń senimdi únqatysýlary basty ról atqarady».
Joǵarǵy Palatanyń basshysy Qazaqstandaǵy reformalardy, bizdiń halyqaralyq arenadaǵy, onyń ishinde BUU Qaýipsizdik Keńesindegi bastamalardy qoldaǵany úshin Qytaıǵa alǵys aıtty, sondaı-aq AО́SShK jáne ShYU aıasyndaǵy nátıjeli yntymaqtastyqty rızashylyqpen atap ótti.
Q.Toqaev qytaılyq «Bir beldeý, bir jol» megajobasy aıasyndaǵy ózara is-qımyldyń erekshe mańyzyna toqtaldy. Senat Tóraǵasy ony iske asyrýǵa 60-qa jýyq elder qosylyp otyrǵanyn, bul álemdik saýda men jalpy ekonomıkada jańa ósý núkteleriniń qalyptasýyna múmkindik beretinin aıtty. Onyń pikirinshe, Uly Jibek joly strategııasyn iske asyrýda Qazaqstan sheshýshi ról atqaratyn bolady, bul ózara tıimdi baılanystardy nyǵaıtýǵa qosymsha múmkindikter beredi.
Senat Tóraǵasy HО́BJ Turaqty Komıtetiniń Tóraǵasy Lı Chjanshýdyń Qazaqstanǵa resmı saparmen kelýi kútilip otyrǵanyn aıtty.
Qytaı dıplomaty HО́BJ-nyń Qazaqstan Parlamentimen yntymaqtastyqty nyǵaıtýǵa ázir ekenin jetkizdi. Chjan Sıao sondaı-aq Qazaqstan Prezıdentiniń taıaýdaǵy Joldaýyn erekshe mańyzdy qujat retinde baǵalady. Elshiniń aıtýynsha, Qytaıda Qazaqstanǵa jáne onyń halqyna zor yqylas bildiredi, Prezıdent Nursultan Nazarbaevty shynaıy qurmet tutady jáne sondyqtan qazaqstandyq reformalardy jan-jaqty qoldaý saıasaty, ekonomıkalyq jáne mádenı baılanystardy óristetý jalǵasyn tabýda. Elbasynyń aldaǵy jyldy Qazaqstandaǵy Jastar jyly dep jarııalaýyna baılanysty ózara tabysty is-qımyldyń qosymsha múmkindikteri paıda bolýy yqtımal.
Elshi 2019 jyly gýmanıtarlyq saladaǵy, atap aıtqanda jastar baılanystary aıasyndaǵy yntymaqtastyqty kúsheıtýge bolar edi, dep sanaıdy. Q.Toqaev bul usynysty oń baǵalady.