Aqtóbe aımaǵynda eńbekaqy mólsherin ósirý men retteý máselelerin taldaıtyn arnaıy jumys toby Prezıdenttiń Qazaqstan halqyna Joldaýy jarııalanǵannan keıin ile-shala qurylǵandy. Top músheleri eń aldymen aımaqtaǵy aılyq jalaqylary 42 500 teńgeden tómen turǵyndardyń sanyn anyqtaýdy kózdegen bolatyn. Keshegi bir kúni olar osy maqsattaryna jetti.
Iаǵnı buǵan deıingi jasalǵan taldaýlar men zertteýler jáne monıtorıngtik baqylaýlar nátıjeleri oblysta joǵaryda atalǵan kategorııaǵa kiretin jumys isteýshiler qatary tup-týra 70 myń ekenin kórsetedi. Onyń 32 myńy bıýdjet salasynyń qyzmetkerleri. Bul rette birinshi kezekte bilim berý salasynda qyzmet jasaıtyn mamandardyń jalaqy mólsherin kóbeıtýge maǵdar ustalǵan.
Jumys toby óńirde atalǵan sanatta 25 myńnan astam qyzmetker bar dep málimdedi. Olardyń eńbekaqylary ortasha eseppen alǵanda 48 600 teńgege deıin ósedi dep kútilýde. Osy oraıda oblystaǵy jalaqy mólsherin ósirý jónindegi naqty is-qımyldar ekonomıkalyq jáne áleýmettik sektordyń barlyq salalaryna qatysty ekenin aıtqan jón. Bul rette búgingi kúni óńirde 15 872 jekemenshik ıeleri men shaǵyn kompanııalar bar ekeni de udaıy nazarda bolyp keledi. Arnaıy jumys toby bul qurylymdarda jalaqylary 42 500 teńgeden tómen 39 myńǵa jýyq adam bar ekenin de shotqa túsirdi.
Bir sózben aıtqanda qazirgi kúni oblysta eń tómen jalaqy alatyn azamattardyń naqty sanyn anyqtaý jumystary odan ári jalǵasýda. Búgingi kún taqyrybyna oraı óz oı-pikirin Aqtóbe oblysynyń ákimi Berdibek Saparbaev gazet tilshisine bylaısha jetkizdi.
Jalaqy – adamdardyń áleýmettik kóńilkıúine áser etetin názik te shetin kúrdeli másele.
Ony retteý men ósirý jónindegi is-sharalar ústirttik pen formaldylyqty kótermeıdi. Biz óńirdegi barlyq iri jáne ortasha kásiporyn jetekshileri jáne arnaıy jumys tobynyń músheleri osy jáıtti nazardan tys qaldyrmaýyn aıtyp kelemiz. Bul rette tek statıstıkalyq málimetterge ǵana arqa súıeý azdyq eteri anyq. Iаǵnı istiń jaǵdaıyn ýaqyt tozdyrmaı tez arada ári tıisti jerde sheshý – naqty nátıjege jaqyndata túspek. Búginde bárimizdiń alǵa qoıyp otyrǵan maqsatymyz osyndaı.
Qazirgi kúni óńirdegi barlyq jumys berýshiler 2019 jyldyń birinshi qańtarynan bastap Prezıdent tapsyrmasy oıdaǵydaı oryndalýyna bir kisideı jumylǵan.
Temir Qusaıyn,
«Egemen Qazaqstan»
Aqtóbe