Batys Qazaqstan oblysy Qaztalov aýdanyndaǵy kitaphanalar jyl basynan beri «Asyq terapııasy» atty jańa joba bastady. Bir qyzyǵy, balalardy eptilikke, mergendikke, tapqyrlyqqa baýlıtyn ulttyq oıyn endi ...latyn álipbıin ıgerýge kómektesip jatyr eken!
Tyń ıdeıanyń týýyna sebepker bolǵan – Qaztalov aýylynda Alma Orazbaeva atyndaǵy mekteptiń 4 synybynda oqyp júrgen Arsen Asylanuly bolyp shyqty. Ol bıylǵy aqpan aıynda ekinshi synyptan beri jınap júrgen 532 asyǵyn Qaztalov aýdandyq ortalyqtandyrylǵan kitaphanasyna syıǵa tartqan. Sondaǵy oıy «bul asyqtyń qyzyǵyn ózim ǵana kórmeı, kitaphana keletin ózge zamandastarymmen bóliseıin» eken. Elbasynyń «Rýhanı jańǵyrý» baǵdarlamasy bastalǵaly beri qaztalovtyq mesenattar erekshe belsendilik tanytyp, týǵan jerine nebir syı-qurmet kórsetip jatqany bala júregine de áser etse kerek. Sóıtip, on jasar oǵylan óz qolyndaǵy eń qymbat «qazynasyn» kitaphanaǵa ákelip bergen.
- Kishkentaı oqyrmanymyzdan kelgen keremet syıdy qalaı paıdaǵa asyrsaq dep kóp oılandyq. Arǵy zamanda asyq qazaq balalarynyń kúndelikti oıyny bolǵanymen, qazir qoldanystan shyǵyp bara jatqany ras qoı. Bastapqyda kitaphana sharalary kezinde oqyrmandarymyzǵa asyq attyryp, sol arqyly suraqtarǵa jaýap bergizip júrdik. Bul oıyndarǵa «Asyq terapııasy» dep at qoıyp aldyq. Al qazir latyn grafıkasyn úıretýge osy asyq terapııasyn paıdalanyp otyrmyz. Asyq arqyly tárbıelegen jas jetkinshek ultynyń tanymynan qol úzbeı, urpaq sabaqtastyǵyn jalǵaıdy dep oılaımyz, - deıdi Qaztalov aýdandyq ortalyqtandyrylǵan kitaphanalar júıesiniń dırektory Gúldana Dáýletova.
Bir qyzyǵy, baǵzy da jańa bastama jan-jaqty qoldaý tapqan. Osy aýdanda Ǵumar Qarash atyndaǵy Qaraoba mektep-gımnazııasynyń 3 synyp oqýshysy Erdáýlet Serjanuly da ózi jınap júrgen 200-deı asyqty aýyl kitaphanasyna tartý etken. Basqa aýyldar da qarap jatpady. Sóıtip Qaztalov aýdanyndaǵy barlyq 46 aýyldyq kitaphanada «Asyq terapııasy» bastalyp ketti.
Asyqpen latyn álipbıin qalaı úırenedi? – Ol úshin asyqtar túrli-tústi boıaýmen boıalady. Sosyn ár asyqqa latyn grafıkasynyń bir árpi jazylady. Kitaphanaǵa kelgen oqyrman osy asyqtardan óz esimin, qysqa sózderdi jazyp úırenedi. Ári oıyn, ári sabaq.
- Elbasymyz «Bolashaqqa baǵdar: rýhanı jańǵyrý» atty maqalasynda «Halqymnyń taǵylymy mol tarıhy men yqylym zamannan arqaýy úzilmegen ulttyq salt-dástúrlerin aldaǵy órkendeýdiń berik dińi ete otyryp, árbir qadamyn nyq basýyn, bolashaqqa senimmen bet alýyn qalaımyn», - dep jazǵan edi. Elimizdiń latyn álipbıine kóshýi - ultymyz úshin jasalǵan mańyzdy qadamnyń biri dep esepteımin. Sondyqtan mundaı mańyzdy bastamany qoldaý, onyń el-jurtqa, sonyń ishinde kishkentaı oqyrmandarymyzdyń sanasyna sińirýge biz de osyndaı jolmen úles qosýdy uıǵardyq, - deıdi Gúldana Dáýletova.
Qazbek QUTTYMURATULY,
«Egemen Qazaqstan»
Batys Qazaqstan oblysy