Túrkııanyń Býrsa qalasynda elimizdegi aıtýly qylqalam sheberleriniń irgeli eńbekteriniń basyn biriktirgen «Uly dala rýhy» kórmesi ashyldy. Baýyrlas eldiń óner súıer qaýymyna usynylǵan kóshpeli kórme QR Mádenıet jáne sport mınıstrliginiń, sondaı-aq Á. Qasteev atyndaǵy Memlekettik óner mýzeıi men Halyqaralyq TÚRKSOI uıymynyń muryndyq bolýymen shymyldyǵyn túrip otyr.
«Uly Dala rýhy» kórmesi kóshpendiler mádenıetiniń, qazaqtyń turmys dástúri, ulttyq at-sporttyq oıyndary, baı ádep-ǵuryptarynyń biregeı ereksheligin kórsetedi. Ol qazirgi zamanǵy túrkitildes elderdiń beıneleý óneri, ótkenge, tarıhqa, onyń aýmaǵynda bolǵan ejelgi órkenıetterge, qazirgi zamanǵy adamzat problemalaryn rýhanı izdenister arqyly tanyp bilýge jeteleıdi.
Túrik kórermenderi otandyq Evgenıı Sıdorkın, Ábdirashıt Sydyhanov, Dýlat Álıev, Ǵanı Baıanov, Bahyt Bapıshev syndy óner sheberleriniń, sondaı-aq Marat Bekeev, Shamıl Gýlıev, Nellı Býbe, Asqar Esdáýlet, Almagúl Meńlibaeva, Andreı Noda, Gúljamal Tagenova, Alpysbaı Qazyǵulov jáne Vıacheslav Lıýı-Ko sııaqty zamanaýı sýretshilerdiń shyǵarmashylyǵymen tanysa alady. Kórme kolleksııasy 32 keskindemelik jáne grafıkalyq týyndyny qamtyǵan.
Mýzeı dırektory, professor Gúlmıra Shalabaeva atap ótkendeı: «Kórme Qazaqstannyń zamanaýı óneriniń keń stılıstıkalyq ártúrliligin ulttyq boıaýy men ózindik ereksheligin aıqyn kórsete otyryp, kórneki túrde usynady. Á. Qasteev atyndaǵy óner mýzeıi sheteldik kórmelerdi ár túrli elderde uıymdastyrý arqyly, qazaq ónerin halyqaralyq deńgeıge kóterip, álem halyqtaryn tól mádenıetimiz, tarıhymyz ben beıneleý ónerimizdiń tereńine úńilýge shaqyrady».
Elbasy Nursultan Nazarbaev «Uly dalanyń jeti qyry» maqalasynda: «Qazaqstan – kúlli túrki halyqtarynyń qasıetti «Qara shańyraǵy». Búgingi qazaqtyń saıyn dalasynan álemniń ár túkpirine taraǵan túrki tektes taıpalar men halyqtar basqa elder men óńirlerdiń tarıhı úderisterine eleýli úles qosty» degen bolatyn. Bul joldar túbi bir túrki halyqtaryna ortaq mádenı qundylyqtardyń qaınar bulaǵy tym áride jatqanyn ańǵartsa kerek. Áıgili Osman ımperııasynyń alǵashqy astanasy sanalatyn Býrsa tórindegi aıtýly kórme baýyrlas elderdiń óneri men mádenıetin odan ári jaqyndastyra túsetin ıgi bastama dep aıtýymyzǵa bolady.
Arman OKTIаBR,
«Egemen Qazaqstan»