Tennısten Devıs kýbogynyń reıtıngi jarııalandy. Bul tizimde Qazaqstan quramasy 3868.75 upaımen 12 orynǵa taban tiredi.
Úzdikter tizimin Fransııa tennısshileri bastap tur. Olar 32637,50 upaı jıǵan eken. Ekinshi orynda – Horvatııa. Horvattardyń qorjynynda 30257,50 upaı bar. Dál osy qos komanda kúni keshe ǵana aıaqtalǵan Devıs kýbogynyń fınaldyq saıysynda ózara kúsh synasyp, bul báseke Horvatııanyń paıdasyna sheshilgen bolatyn. 15685 upaımen Argentına quramasy úshinshi orynǵa taban tiredi. Bıylǵy maýsym Ońtústik Amerıka oǵlandary úshin asa sátti bolmady. Bıyl olar aıtýly jarystyń álemdik tobyna da shyǵa almady. Alaıda argentınalyqtardyń osyǵan deıin jıǵan upaı qory úzdikter sanatynan kóriný úshin jetkilikti boldy.
Tórtinshi orynda – Belgııa (14941,25 upaı). Belgııalyqtar bıyl Devıs kýbogynyń shırek fınalyna shyqty. Odan keıingi satylarǵa Ulybrıtanııa (11916,25 upaı), AQSh (9849,38 upaı) jáne Ispanııa (9149,38 upaı) jaıǵasty. Bıylǵy jarysta brıtandyqtar 1/8 fınalda súrinse, amerıkalyqtar men ıspandyqtar jartylaı fınalda óner kórsetti. Sondaı-aq, «TOP-10» komandanyń qatarynda Serbııa (7000 upaı), Avstralııa (6712 upaı) jáne Italııa (5826 upaı) quramalary bar.
Bir aıta keterligi, Qazaqstan burynǵy TMD elderi arasyndaǵy eń úzdik kórsetkishke qol jetkizip otyr. Tipten, Reseıdiń ózi jerlesterimizden kóp qalyp qoıdy. Olar 1633 upaımen 22 oryndy qanaǵat tutýda.
Ǵalym SÚLEIMEN,
«Egemen Qazaqstan»