Parlament Senatynyń Tóraǵasy Qasym-Jomart Toqaev О́zbekstannyń Olıı Májilisi Zańnama palatasynyń tóraǵasy Nýrdınjon Ismoılovpen kelissóz ótkizdi.
Q.Toqaev Qazaqstan men О́zbekstan basshylarynyń kúsh-jigeriniń arqasynda eki el arasyndaǵy qatynastar sońǵy jyldary jańa qarqynǵa ıe bolǵanyn atap ótti. «Elderimizdiń belsendi yntymaqtastyǵy jáne búkil Ortalyq Azııanyń tabysty ekonomıkalyq damýy, turaqtylyǵy men qaýipsizdigi Qazaqstan men О́zbekstannyń halyqaralyq arenadaǵy ózara is-qımylyna baılanysty», - dedi Senat Tóraǵasy.
Júzdesýshiler Prezıdent N.Nazarbaevtyń «Uly dalanyń jeti qyry» maqalasy boıynsha pikir almasty. Q.Toqaev atap ótkendeı, Elbasy óziniń maqalasynda ótkenniń murasyn shyǵarmashylyq turǵyda zerdelep, bizdiń halqymyzdyń jahandyq órkenıetke qosqan úlesin laıyqty baǵalaýdy usynady. «Elimizdiń damýynyń keleshegin jańa qyrynan baǵalaý úshin biz eń aldymen óz tarıhymyzdy maqtan tutýǵa tıispiz», - dedi Q.Toqaev. Senat Tóraǵasynyń aıtýynsha, Prezıdent bastaǵan iri jobalar «Rýhanı jańǵyrý» baǵdarlamasynyń zańdy jalǵasy bolǵaly otyr.
Q.Toqaev sondaı-aq О́zbekstanmen parlamentaralyq yntymaqtastyqty jáne ózbek áriptesterimizben halyqaralyq uıymdar aıasynda baılanystardy nyǵaıtý qajettigin atady.
Kezdesýge qatysýshylar eki eldiń zań shyǵarý organdarynyń saýda-ekonomıkalyq, kólik-tranzıt jáne gýmanıtarlyq baılanystardy keńeıtýdi yntalandyrýǵa ázir ekenin naqtylady. Q.Toqaev 15 qarashada Shymkentte ótken alǵashqy Aımaqaralyq forýmnyń qorytyndylaryn joǵary baǵalap, iskerlik qaýymdardyń osyndaı kezdesýlerin jalǵastyrýdyń mańyzdy ekenin atap ótti. Senat Tóraǵasynyń pikirinshe, mundaı sıpattaǵy kezdesýler shekara mańyndaǵy baılanystarǵa salmaqty serpin berip, ekijaqty saýdaǵa eleýli túrde qarqyn bere alady. Eki el basshylarynyń aıtýynsha, 2020 jylǵa qaraı Qazaqstan men О́zbekstan arasyndaǵy saýda kólemi 5 mıllıard dollarǵa deıin jetýi tıis. Q.Toqaevtyń pikirinshe, degenmen mundaı joǵary kórsetkishke qol jetkizý úshin eki el úkimetteri men parlamentteriniń aýqymdy kúsh-jigeri qajet.
О́z kezeginde, N.Ismoılov ózbek tarapy elderimiz arasyndaǵy dostyq qatynas pen yntymaqtastyqty nyǵaıtýǵa bar kúshin salýǵa ázir ekenin jetkizdi.