Qazaqstan Respýblıkasynyń Memlekettik hatshysy Gúlshara Ábdiqalyqovanyń tóraǵalyǵymen Shetelde kadrlar daıarlaý jónindegi respýblıkalyq komıssııanyń otyrysy ótti.
Jıyndy ashqan G.Ábdiqalyqova Nursultan Nazarbaevtyń «Memlekettiń barlyq bastamalary halqymyzdyń turmys deńgeıin jaqsartýǵa baǵyttalǵan. Jurttyń sapaly bilim alyp, suranysqa ıe mamandyǵy men laıyqty jumysy bolǵanda ǵana ál-aýqatymyz artady» degen sózine toqtaldy.
– «Bolashaq» stıpendııasy – Memleket basshysy aýqymdy jańa jobalardy iske asyrýdyń biregeı tetigi retinde aıqyndap bergen basym baǵyttardyń biri, – dedi Memlekettik hatshy.
Komıssııa otyrysynda Shetelde kadrlar daıarlaý jónindegi respýblıkalyq komıssııanyń hattamalyq tapsyrmalarynyń oryndalýy týraly Bilim jáne ǵylym mınıstrliginiń esebi tyńdaldy, sondaı-aq «Bolashaq» stıpendııasynyń júzege asyrylýyna qatysty birqatar máseleler qarastyryldy.
Komıssııanyń sheshimimen 2019 jylǵa arnalǵan basym mamandyqtardyń tizbesi bekitildi. Qujatta 155 mamandyq qamtylǵan. «Bolashaq» halyqaralyq stıpendııasy boıynsha taǵylymdamadan ótetinderdiń sanaty anyqtaldy. 2019 jylǵa 555 stıpendııa bekitildi.
Stıpendııa magıstratýra men doktorantýrada oqýǵa, sondaı-aq álemniń jetekshi ǵylymı jáne óndiristik ortalyqtarynda taǵylymdamadan ótýge joldanatyn 71 úmitkerge taǵaıyndaldy.
Jıyn qorytyndysy boıynsha Memlekettik hatshy Gúlshara Ábdiqalyqova «Bolashaq» halyqaralyq stıpendııasyn júzege asyrýdy odan ári jalǵastyrý jóninde birqatar tapsyrma berdi.
Serik ÁBDIBEK,
«Egemen Qazaqstan»