Qazaqstandy ózgertken bastamalar

Sońǵy aılarda Elbasy, partııa Tóraǵasynyń tapsyrmasy boıynsha «Nur Otan» partııasy óz qyzmetin jań­ǵyrtý jumystaryn júıeli túrde júr­gizip keledi. Osy maqsatta kóptegen tyń bastama men naqty joba qol­ǵa alyn­dy. Sondaı-aq osyǵan deıin tıim­diligin dálel­degen keıbir ıgi bastamalar da jańa­sha sıpat alyp, jandana tústi. Solardyń biri – «NurOtanTalks» jobasy.

Qatysýshylar taqyrypqa saı táýel­s­iz Qazaqstannyń Tuńǵysh Prezı­denti, Elbasy Nursultan Ábishuly Nazarbaevtyń elimizdi damýdyń jańa deńgeıine alyp shyqqan bastamalary men tarıhı sheshimderi jaıynda keńinen sóz qozǵady. Sondaı-aq olar ózderiniń Memleket basshysymen kezdesýlerin, bul oqıǵanyń ómirlerine qalaı áser etkenine toqtaldy. Odan bólek, Elbasynyń mańyzdy bastamalary qalaı ómirge kelgenin, olardyń qabyldanýyna qan­daı oqıǵalardyń sebep bolǵanyn jáne sol bastamalardy júzege asyrýda ózderiniń naqty qandaı úles qosqanyn da kópshilikke áńgimelep berdi.

Alǵash bolyp sóz alǵan «Nur Otan» partııasy Tóraǵasynyń birinshi orynbasary Máýlen Áshimbaev Elbasy she­shim­deriniń el damýyndaǵy róli men mańyzyna qatysýshylar­dyń nazaryn aýdardy. Sondaı-aq ol óz tájirı­besin­degi keıbir esteliktermen de bólisip, jas qazaqstandyqtardyń erteńgi kúnge degen senimin kúsheıte tústi.

Máýlen Áshimbaev elimiz táýelsizdik alǵan kúnnen bastap turaqty damý jolynan jańylmaı, kózdegen mejege batyl qadam basyp kele jatqanyn aıtty. Ol osy ýaqyt aralyǵynda Qazaqstannyń Elbasy bastamalarynyń arqasynda ekonomıkada, saıasatta jáne áleýmettik salada aýyz toltyryp aıtarlyqtaı jetistikterge jetkenin tilge tıek etti. Partııa Tóraǵasynyń birinshi orynbasary sonyń ishinde el damýyna jáne qoǵamnyń alǵa jyljýyna aıryqsha áser etken asa mańyzdy úsh strategııalyq bastamaǵa toqtalyp ótti.

– Elbasynyń úlken mańyzǵa ıe «Bolashaq» baǵdarlamasyn Qazaqstannyń kemel keleshegine salynǵan ınvestısııa dep aıtýǵa tolyq negiz bar. Shırek ǵasyr buryn bastaý alǵan bul bastama osy ýaqyttyń ishinde 13 myńnan astam qazaqstandyq azamattyń sheteldiń aldyńǵy qatarly ýnıversıtetterinde bilim alýyna múmkindik berdi. Dál qazir Memleket basshysynyń osy jobasy óz jemisin berip, «Bolashaqpen» bilim alǵan birqatar bilikti azamattar ákim, mınıstr sııaqty laýazymdy qyzmetterdi atqaryp júr. Sondyqtan baǵdarlama túlekteri aldaǵy ýaqytta da elimizdi jańa beles­terge jeteleıtin patrıot azamat bolyp qalyptasatynyna eshqandaı kúmánim joq, – dedi Máýlen Áshimbaev.

Bilim alýdyń mańyzyna toqtalyp ótken «Nur Otan» partııasy Tóraǵasy­nyń Birinshi orynbasary búginde búkil álem tórtinshi revolıýsııa dáýirine qadam basyp, jańa kezeńde ómir súrip jatqanyn aıtty. Osyndaı kezde mem­leketterdiń negizgi baılyǵy tabıǵı shıkizat nemese mıneraldy resýrstar emes, kerisin­she bilimdi de bilikti, patrıot azamattar ekenin eske saldy. Sondyqtan ol Elbasy­nyń 25 jyl boıy júıeli túrde jastarǵa qamqorlyq jasap kele jatqanyn, jas qazaqstandyqtardyń sol múmkindikti múlt jibermeı shetelde bilim alýǵa umtylý kerek ekenin aıtyp, keńesin berdi.

Elimizdiń damýyna orasan zor yq­palyn tıgizgen Elbasynyń kelesi bastamasy týraly aıtqan Máýlen Áshimbaev bul isti tarıhı sheshim dep baǵalady.

– El damýyndaǵy erekshe oqıǵalar­dyń biri bolǵan Elbasynyń kelesi strate­gııalyq bastamasy da «Bolashaq» baǵ­dar­lamasy sııaqty áli kúnge deıin Qazaq­standy jarqyn bolashaqqa bastap keledi. Ol – Qazaqstan Prezıdentiniń osydan 20 jyl buryn elordamyzdy Almatydan sol kezdegi Aqmolaǵa aýystyrý týraly tarıhı sheshimi. Sonyń nátıjesinde búginde bárimizdiń súıikti qalamyzǵa aınalǵan Astananyń irgesi qalandy. Bul sheshimdi Elbasy elimizdegi eń bir qıyn kezeńde, áleýmettik jaǵdaıdyń ýshyǵyp turǵan shaǵynda, ekonomıkalyq daǵdarys beleń alyp, turmystyq jaǵdaı tyǵyryqqa tirelgen sátte úlken táýekelmen qabyldady. Búginde Elbasymyzdyń bul qadamy elimizdiń ekonomıkalyq, áleýmettik, saıası damýyna tyń serpin berip qana qoımaı, Qazaqstanda ınfraqurylymnyń nyǵaıýyna, soltústik óńirlerimizdiń jandanýyna jáne táýelsizdigimizdiń kúsheıýine úlken áserin tıgizgen asa mańyzdy bastama ekenin kórip otyrmyz. Qazir Astana tek ásem qala ǵana emes, halyqaralyq ózekti máseleler sheshiletin iri ortalyqqa, álemge beıbitshilik pen kelisimdi pash etip turǵan altyn besikke aınaldy. Sondaı-aq elordamyz álemdik qarjy jáne ınnovasııalyq ortalyqqa da aınalyp kele jatqanyn kórip otyrmyz. Sondyqtan Astanany tek Qazaqstannyń ǵana emes, halyqaralyq deńgeıdegi qundylyqtardyń damýyna oń áserin tıgizgen eń utymdy joba dep bilemin, – dedi Máýlen Áshimbaev.

О́z sózinde partııa Tóraǵasynyń Birinshi orynbasary Astanany memleket­tik basqarý mektebi úshin de óte utymdy tájirıbe ekenin atap ótti.

Al Qazaqstannyń álemdik bıikke kóterilýine áser etken Elbasynyń úshin­shi mańyzdy bastamasy retinde Máýlen Áshimbaev «Rýhanı jańǵyrý» baǵdarlamasyn aıtty.

– Úshinshi strategııalyq bastama – «Rýhanı jańǵyrý» baǵdarlamasynyń júzege asyrylýy. Búginde júıeli túrde júrgizilip kele jatqan bul baǵyttaǵy jumystardyń da el bolashaǵy úshin mańyzy zor. Atalǵan baǵdarlamanyń birinshi bóliminde ulttyq kodymyzdy saqtaýǵa, tarıhymyzdy tereń zertteýge kóp kóńil bólingen. Elbasynyń «Uly dalanyń jeti qyry» maqalasy da dál osy baǵdarlamanyń jalǵasy ekenin atap ótken jón. Bul bastamanyń taǵy bir qyry, ıaǵnı ekinshi bólimi Qazaqstannyń álemdik trendterge beıimdelýine arnalǵan. Iаǵnı damý men ulttyq sanany qalyptas­tyrý­da jahannyń ozyq tájirıbeleri­nen úırenip, utymdy tustaryn ózimizdiń jumysymyzda qoldana bilýimiz kerek. Bul rette negizgi úmit jastarda ekeni túsinikti. Bilimge qushtarlyqty jáne básekege qabilettilikti arttyrý sııaqty ıdeıalar men qundylyqtardy dáripteý osy baǵdarlamanyń negizgi basymdyǵy. Sondyqtan Elbasynyń atalǵan bastamalary Qazaqstannyń oń baǵytta ózgerýine úlken áserin tıgizgeni sózsiz, – dedi Máýlen Áshimbaev.

Sonymen qatar M.Áshimbaev Elbasy­men birge jumys isteýdi ózine berilgen úlken múmkindik dep esepteıtinin jáne Memleket basshysynyń janynda júrip kóp nárse úırengenin aıtty. Sondaı-aq ol Qazaqstan Prezıdentiniń kópke úlgi bolarlyq basty úsh qasıetin de atap ótti.

– Birinshiden, Elbasynyń únemi ózin ózi jetildirip, izdenip, jańa, tyń bas­tamalardy meńgerýdegi tabandylyǵyn aıryqsha aıtqym keledi. Bul – naǵyz kóshbasshyǵa tán qasıet. Bárimiz, ásirese jastar dál osy qasıetti boıyna sińirip, ózderine úlgi etýi tıis. Ekinshi erekshe qasıet retinde Elbasynyń aıryqsha jaýapkershiligi men ózine-ózi joǵary talap qoıatynyn atap óter edim. Memleket basshysy kez kelgen kezdesý men is-sharaǵa óte tyńǵylyqty ári jan-jaqty daıyndalady. О́zime erekshe áser etken Elbasynyń kelesi qasıeti retinde uqyptylyǵy men muqııattylyǵyn aıtar edim. Qandaı tyǵyz jaǵdaı bolsa da Memleket basshysy halyqty kútkizbeı, belgilengen is-sharalardy ýaqytynda bastaıdy. Bul – búginde bılik tutqasyn ustaǵan barsha azamattarǵa úlgi bolatyn qasıet. Prezıdentimizdiń osyndaı qasıet­terinen ózim de kóp nárse úırenip, mol tájirıbe jınadym, – dedi M.Áshimbaev.

Odan bólek, «Nur Otan» partııa­sy Tóraǵasynyń birinshi orynbasary Elbasynyń bastamasyna úles qosqysy kelgen jastardyń eń aldymen sapaly bilim alyp, kóp eńbek­tený kerektigin, bul rette Elbasynyń «Bolashaq» baǵdarlamasymen bilim alýǵa umtylýy qajettigin aıtty. О́ıtkeni bul – kóptegen elde, tipti AQSh-tyń ózinde qarapaıym halyqtyń qoly jete bermeıtin múmkindik. 

О́z kezeginde is-sharaǵa qatysýshy «Mıloserdıe» qaıyrymdylyq qorynyń negizin qalaýshy Arýjan Saın Elbasymen kez­desý­lerdiń óz ómirindegi eń eleýli sát­ter ekenin aıtty. Sondaı-aq ol jastarǵa óz­derine unaıtyn ispen aınalasýdy, ár iste tek ózine ǵana emes, qoǵamǵa da paıdaly bolýdy nazarda ustaý kerektigin aıtty.

Al Halyqaralyq Túrki akademııa­synyń prezıdenti Darhan Qydyráli Elbasynyń «Uly dalanyń jeti qyry» maqalasy tek túrki dúnıesi úshin ǵana emes, búkil álem úshin mańyzdy eńbek ekenin jetkizdi. Onyń sózine qaraǵanda, qazirdiń ózinde atalǵan maqala álemniń toǵyz birdeı tiline aýdarylǵan.

Talaı janǵa ota jasap, dertine shıpa bolǵan álemdik deńgeıdegi hırýrg Iýrıı Pıa óziniń elimizdiń damýyna úles qosyp, Astanada jumys istep júrýi tikeleı Elbasynyń arqasy ekenin aıtty.

– Astanaǵa kelmes buryn 10 jyl shetelde jumys istedim. Osydan 15 jyl buryn, ıaǵnı 2003 jyldyń 13 qańtarynda Elbasymen alǵash ret kezdestim. Sol kezdesýde Memleket basshysy elimizde kardıohırýrgııa salasyn damytýymyz kerektigin aıtyp, jańadan qurylatyn kardıohırýrgııa ortalyǵyna maman qajet ekenin aıtty. Osylaısha men Astanaǵa qaıtyp kelý týraly sheshim qabyldadym, – deıdi Iýrıı Pıa.

Sonymen birge is-shara barysynda elimizdiń baǵyt-baǵdaryn anyqtap, halyqtyń ál-aýqatyn arttyryp jáne Qazaqstannyń álemdik qoǵamdastyqtaǵy abyroı-bedelin kúsheıtken Elbasy bastamalary da keńinen aıtyldy. Pikirtalas alańyna arnaıy kelgen jastar Elbasy bastamalaryn júzege asyrýǵa tikeleı qatysyp, sol jolda ter tógip júrgen azamattardan ózderin tolǵandyrǵan saýaldaryna jaýap aldy. Osylaısha «Nur Otan» partııasy Tuńǵysh Prezıdent kúnine arnalǵan is-sharalar legin bastap, merekeniń máni men mańyzyn dáripteýge óz úlesin qosyp otyr.

Aıta keteıik, elimizde Tuńǵysh Prezı­dent kúni – ár jyldyń 1 jeltoqsa­nyn­da atalyp ótetin memlekettik mereke. Ataýly kún 2011 jyldyń 10 jeltoqsanynda Parlament Senatynyń otyrysynda «Qazaqstan Respýblıkasynyń zańy­na tolyqtyrýlar engizý týraly» zań­namasyna sáıkes bekitildi. Bul mereke Qazaqstan Respýblıkasynyń Tuń­ǵysh Prezıdenti, Elbasy Nursultan Nazarbaevtyń memleket aldyndaǵy eren eńbegi men elimizdi jańa bıikterge bastaǵan ıgi isterin jan-jaqty taný maqsatynda uıymdastyrylǵan.

Abaı ASANKELDIULY,

«Egemen Qazaqstan»