Búgin Qazaq memlekettik qyzdar pedagogıkalyq ýnıversıtetinde jazýshy, halyqaralyq «Alash» ádebı syılyǵynyń ıegeri, Qazaqstannyń eńbek sińirgen qaıratkeri Shárbaný Beısenovanyń «Uly dala arýlary» serııasy boıynsha jaryq kórgen «Bozoq arýy» kitabynyń tanystyrylymy ótti.
Elbasynyń «Rýhanı jańǵyrý» baǵdarlamasy aıasynda oqyrmanǵa jol tartqan bul kitaptaǵy analar galereıasy – túrki arýlaryn jańǵyrtyp, olardyń tól tarıhymyzdaǵy ornyn aıshyqtap otyr.
– Azamattyq úniniń aıqyndyǵymen, názik syrshyldyǵymen erekshelenetin Shárbaný Qonaqbaıqyzynyń shyǵarmalary týǵan eldi súıý, adaldyq, dostyq, mahabbat sezimderin arqaý etedi. Qalamgerdiń «Toıǵa kelgen kelinshek», «Sezimtal júrek», «Taǵylymdy taǵdyrlar», «Mızamshýaq», «Súzgeniń sońǵy kúnderi» syndy shyǵarmalar jınaǵy kóziqaraqty talaı jannyń kókeıine sińdi. Syrlasar serigi boldy. Taýsylmas rýhanı azyǵyna aınaldy. Shárbaný Beısenovanyń «Uly dala arýlary» toptamasymen jaryq kórip kele jatqan kitaptar serııasy – ult tarıhynda erekshe oryn alyp, el jadynda saqtalǵan áýlıe analar ómirinen syr shertedi, – dedi oqý ornynyń rektory Gaýhar Aldambergenova
Sonymen qatar shara barysynda jazýshy, Halyqaralyq «Alash» ádebı syılyǵynyń ıegeri Sara Latıeva, qalamger, jýrnalıst Zarıa Jumanova Shárbaný Beısenovanyń qalamgerlik qoltańbasy týrasynda áńgime órbitip, estelikterimen bólisti. Jıynda ýnıversıtet stýdentteri jazýshyǵa qyz bala tárbıesi, búgingi ádebıettiń jaı-kúıi jáne óziniń qalamgerlik joly jaıynda suraqtar qoıyp, tolymdy ári paıymdy jaýap aldy.
Osy arada Shárbaný Beısenovanyń «Uly dala arýlary» jobasy sheńberinde buǵan deıin de «Súıinbıke» kitaby jaryq kórgenin aıta ketýge bolady.
«Folıant» baspasynan shyqqan jınaqta arheologııalyq qazbadan tabylǵan aıymdar, sondaı-aq áıel-ana týraly málimetter folklorlyq muramen sabaqtastyryla qaralyp, tanymdyq, aqparattyq baıan túrinde usynylǵan.
Jazýshy «Bozoq arýynda» Elordanyń irgesindegi ejelgi Bozoq qalasyna júrgizilgen arheologııalyq qazba jumystary kezinde tabylǵan arý qańqasyna til bitire otyryp, eldik máseleniń ıirimine qatysty tanymdyq, taǵylymdy oılardy qozǵaıdy. Búgingi elorda tarıhy kesheli beriden emes, ejelgi dáýirlerde irgetasy qalanǵanyn, oǵan Elbasy Nursultan Nazarbaevtyń: «Ortaǵasyrlyq Bozoq qalasy – Aqmolanyń tikeleı atasy, al onyń sońǵy urpaǵy – qazirgi Qazaqstannyń elordasy Astana dep esepteýge bolady», degen sózin basty dáıek retinde alyp, Bozoq qalasyn topyraqtan arshyǵan arheolog-ǵalym Kemel Aqyshevtiń dálelderin, onyń ishinde qazba jumysy kezinde tabylǵan áıel múrdesiniń eki jaǵyna qoıylǵan 800 injý monshaqtyń tabylýy mysaldarmen aıtylyp, hıkaıattyń basty keıipkeri Shyraqbektiń túsine eles bolyp til qatatyn Injý arasynda damıdy.
Aınash ESALI,
«Egemen Qazaqstan»
ALMATY