«Alash Praıd» klýbynyń uıymdastyrýymen 20 jeltoqsanda Taldyqorǵan qalasynda erejesiz jekpe-jekten halyqaralyq týrnırdiń uıymdastyrylatyny belgili.
Osy jarystyń basty básekeleriniń birinde «Saq» degen búrkenshik esimmen tanylǵan Asyljan Baqytjanuly aıqas alańyna shyǵady. 93 kılo salmaqta kúsh synasyp júrgen qazaqtyń nar tulǵaly azamaty bul kúnderi aıshyqty ónerimen kózge túsip júr. Osy kúnge deıin 8 kezdesý ótkizgen ol jeti ret jeńiske jetti. Tek bıylǵy jyldyń mamyr aıynda Máskeýde ótken AVS týrnırinde qandasymyz reseılik Músilim Magomedovtan utyldy.
Kúni keshe Asyljannyń Taldyqorǵandaǵy týrnırde kimmen aıqasatyny belgili boldy. Qazaq jigitiniń qarsylasy – Amılkar Alvesh. Brazılııanyń sportshysy osy kúnge deıin oktagonda 29 ret óner kórsetip, 13 básekeni óz paıdasyna sheshti. Kezinde Alvesh álemdegi eń beldi uıym – UFC-de baq synaǵan.
Ǵalym SÚLEIMEN,
«Egemen Qazaqstan»