Elbasymyz N.Nazarbaevtyń «Uly dalanyń jeti qyry» atty maqalasy elimizde úlken órleý týǵyzyp otyr. Prezıdent tarıhı eńbeginiń «Ult tarıhyndaǵy keńistik pen ýaqyt» dep atalatyn bóliminde qazaqtardyń arǵy babalary ulan-ǵaıyr Eýrazııa qurlyǵyndaǵy saıası jáne ekonomıkalyq tarıhtyń betalysyn talaı ret túbegeıli ózgertkeni týraly syr sherte kele, Uly dalanyń jeti qyryna jeke-jeke toqtalyp, naqty anyqtama beredi.
Keń-baıtaq Qazaq eliniń jeti qyry – Atqa miný mádenıeti, Uly daladaǵy ejelgi metallýrgııa, Ań stıli, Altyn adam, Túrki áleminiń besigi, Uly Jibek joly, Qazaqstan – alma men qyzǵaldaqtyń otany ekenin naqty aıǵaqtarmen dáleldeıdi.
Prezıdent keltirip otyrǵan «Túrki áleminiń besigi» jan-júregimizdi tebireniske bóleıdi. Maqalada aıtylǵandaı, bizdiń dáýirimizdiń I myńjyldyǵynyń orta sheninde Túrki dúnıesi paıda bolyp, Uly dala tósinde jańa kezeń bastaldy. Orasan zor keńistikti ıgere bilgen túrkiler ulan-ǵaıyr dalada kóshpeli jáne otyryqshy órkenıettiń ózindik órnegin qalyptastyryp, óner men ǵylymnyń jáne álemdik saýdanyń ortalyǵyna aınalǵan ortaǵasyrlyq qalalardyń gúldenýine jol ashty. Orta ǵasyrdaǵy Otyrar qalasy álemdik órkenıettiń uly oıshyldarynyń biri – Ábý Nasyr ál-Farabıdi dúnıege ákelse, túrki halyqtarynyń rýhanı kóshbasshylarynyń biri Qoja Ahmet Iаsaýı Túrkistan qalasynda ómir súrip, kúlli álemge ilimin taratty. HHI ǵasyr túrkiler ǵasyry bolady dep úmittener bolsaq, osynaý uly jolda oblys ortalyǵy, rýhanı astanamyz – Túrkistannyń atqarar róli aıryqsha ekeni aıqyn. Uly oıshyl ál-Farabı men rýhanı kósem Qoja Ahmet Iаsaýıdiń shapaǵatymen nurlanǵan qazaq halqynyń ataq-dańqy asqaqtap, mártebesi bıikteı túseri sózsiz. Osyndaı tereń maǵynaly eńbegi úshin Prezıdentke sheksiz alǵys aıtamyn.
Jarqynbek QULBAIYMBETOV,
Túrkistan qalalyq Ardagerler keńesiniń tóraǵasy