Sańlaq boksshy dúnıeden erte ótse de, artyna aıtarlyqtaı iz qaldyrdy. Kamıl Safın el sportynyń damýyna mol úles qosqan sportshy retinde zor qurmetke ıe boldy. Halyqaralyq dárejedegi sport sheberi sharshy alańda jasyndaı jarqyldap, Eýropa chempıonatynyń kúmis júldegeri, álem kýbogynyń, KSRO-AQSh matchy kezdesýiniń, KSRO Halyqtary spartakıadasynyń jáne kýbogynyń tórt márte jeńimpazy atandy.
Petropavl qalasynda boks mektebi irgetasynyń qalanýyna tikeleı uıytqy bolyp, birneshe jyl basshylyq etti.
Petropavldyqtar dańqty jerlesine aıryqsha qurmet kórsetip, bokstan oblystyq olımpıadalyq rezervtegi mamandandyrylǵan balalar men jasóspirimder mektebiniń janyna eskertkish músin ornatyldy. Saltanatty sharada Mádenıet jáne sport mınıstrligi Dene shynyqtyrý jáne sport komıtetiniń jetekshisi Serik Jarasbaev, aımaq basshysynyń orynbasary Madııar Qojahmet sóılep, sanaly ǵumyryn sportqa arnaǵan tulǵa esimi umytylmaıtynyn, onyń bir aıǵaǵy retinde eske alý týrnıri jyl saıyn uıymdastyrylatynyn, boks mektebine esimi berilgenin jetkizdi. Bokstan Eýropa chempıony, álem kýbogy halyqaralyq týrnıriniń kúmis júldegeri, Kamıldiń dosy Serik Nurqazov óz esteligimen bólisti.
«Ákem sport dese, ishken asyn jerge qoıatyn. Talapty, talantty balalardy kórse, boks mektebine qolynan jetelep ákeletin. Rýmynııa, Polsha, Vengrııa, AQSh, taǵy basqa elderde ótken dodaly básekelerde únemi top jaryp, el namysyn joǵary ustady», degen uly Damır sharany uıymdastyrýshylarǵa júrekjardy alǵysyn bildirdi.
Músinniń avtory Svetlana Brıýtovanyń Kamıl Safın jaıly maǵlumattardy molynan jınastyryp, músindi kelistirip jasaǵany birden baıqalady.
О́mir ESQALI,
«Egemen Qazaqstan»
Soltústik Qazaqstan oblysy