Shamamen bizdiń dáýirdiń IV-V ǵasyrynda túrkilerdiń shetki ordasyn tabyǵash-shúrshit áskeri qorshap alady. Jaýlar ordany janaı aǵatyn ózenniń sýyn buryp, syrttan qatynaıtyn barlyq joldy jaýyp tastaıdy. Onymen qoımaı, bekinisti otty jebemen atyp, órteıdi.
Sol kezde orda bekinisin qorǵaýshy bas sardar jasy toqsannan asqan zaǵıp áýlıe-anasyna baryp: «Ýa, anashym, ne isteımiz jaýǵa berilemiz be, álde qasyq qanymyz qalǵansha shaıqasamyz ba, sheshimin aıtyńyz?» dep suraıdy. Anasy aıtady: «Ulym, sen ádilet úshin shaıqasýdasyń, eger jaýǵa berilseń, keıingi urpaq seniń osy úlgińdi ónege tutyp ketpesine kim kepil, shaıqas, balam! Túrki tuqymy ordasyn qorǵap, erlikpen ólýdiń úlgisin kórsin», deıdi.
Ana úkimin estigen bas sardardyń janary shoqtaı jaınap «Ýa, meniń áýlıe-anam, sózińizdi taǵy bir qaıtalańyzshy!», dep ótinedi. Keıýananyń amanatyn bul joly tiri qalǵan túrki sarbazdary qatar turyp tyńdaıdy. Sóıtip kúńirenip kún túbine jortyp úırengen túrki jankeshtileri ala tańmen atoılap, shúrshittiń shańyn qylyshpen qaǵýǵa daıyndalady. Sol kúni ǵalamdy jaryq nurǵa bólep, shyǵystan shyraıyn shashyp kún de shyǵady. Sheıit ketýdiń sherin ańsaǵan sarbazdar sapqa turady. Dál osy tusta bas sardardyń anasy kelip: «Eı, ulym, shesh saýytyńdy, qas jaýyna tek kóılekpen shyq. Kórsin myna jaýlar meniń qandaı ul tapqanymdy», deıdi.
Bas sardardyń sheshinip tastap jalań tósimen jaýǵa shapqaly turǵanyn kórgen basqa sarbazdar da sheshinedi. Jalańash batyrlar jaýmen aıanbaı shaıqasady. Jasanyp kelgen jaýdy qoǵadaı japyrady, biraq biri de tiri qalmaıdy. Jeńgen jaý qalǵan túrkilerdi qorqytý úshin bas sardardyń basyn kesip alyp, uzyn syryqqa shanshyp, ordasynyń aldyna ilip qoıady. Bul oqıǵa týraly batyrdyń anasyna habar jetkende, keıýana «oıpyrym-aı, ulymnyń jansyz basy tirilerge «erliktiń úlgisi myna menmin» dep ýaǵyz aıtyp turǵanyn qarashy» depti.
Beken QAIRATULY,
«Egemen Qazaqstan»