«Atameken UKP» oblystyq kásipkerler palatasynda bizdiń óńirdegi tuńǵysh jekemenshik «Kasip-kz» jumyspen qamtý agenttiginiń tusaýkeser rásimin ótkizdi.
Birden aıta ketý kerek, sony jańalyqtyń elge jaqsylyǵy mol bolmaq. Oblystyq áleýmettik baǵdarlamalardy úılestirý jáne jumyspen qamtý basqarmasy turǵyndarǵa qyzmet kórsetý ortalyqtary, kásiporyndar men bilim berý júıesi jańa júıeniń senimdi áriptesteri bolýǵa qulshynyp otyr.
– О́zara yntymaqtastyq týraly memorandýmdarǵa qol qoıylýynyń ózi ortaq istiń arnasyn keńite túsedi,–dedi oblys ákiminiń orynbasary Qanat Ydyrysov, – bul is turǵyndardyń turmys sapasyn jaqsartýǵa, kásipkerlikti damytýǵa ári memlekettik baǵdarlamalardyń múltiksiz oryndalýyna septigin tıgizedi.
Jobanyń negizgi maqsaty eki qolǵa bir kúrek taba almaı júrgen turǵyndardy nátıjeli jumyspen qamtý, qolaıly kásip izdeýge kómektesý, osy baǵytta keńes berý.
Oblystyq kásipkerler palatasynyń derekterine qaraǵanda, óńirde 20 myńnan astam turǵyn jumyssyz retinde tirkelgen. Kerisinshe, aǵymdaǵy jyldyń qarasha aıynda júrgizilgen monıtorıngte oblystyń 250 kásipornynda eki myń jumys ornynyń bos turǵany anyqtalǵan. Mine, endi osy oraıdaǵy qıyn túıinniń saýalyn jańa qyzmet sheshpek.
– Elbasy Nursultan Nazarbaevtyń bıylǵy Joldaýynda eldiń turmysyn jaqsartyp, tabysyn molaıtýǵa aıryqsha mán berildi,–deıdi Aqmola óńirlik kásipkerler palatasynyń dırektory Tımýr Naqypbekov,–jańa jobanyń ereksheligi áleýmettik mindetterge negizdelip otyr. Yntasy bar adamdarǵa bos jumys oryndaryn qolaıyna oraı tańdaý múmkindigi beriledi. Al, jumys berýshiler bolsa, ózderine qajetti jumysshylardy irikteı alady.
Eńbek mıgrasııasy bıznestiń de damýyna áser etpek. Bıznes damysa, salyq túsimderi de arta túsetindigi belgili.
Tusaýkeser aıasynda jańa jobanyń áriptesteri Aqmola oblysynyń ákimdigi, Shymkent qalalyq, Soltústik Qazaqstan, Aqmola oblystyq kásipkerler palatasy, jumyspen qamtý ortalyqtary jáne jergilikti jumys berýshiler arasynda yntymaqtastyq memorandýmdarǵa qol qoıyldy. Bul iske «Kókshetaý sút zaýyty», «Kamaz-Injınırıng» jáne «Tynys» aksıonerlik qoǵamdary «KAIN» jaýapkershiligi shekteýli seriktestigi tárizdi birqatar ujymdar qatysty.
Baıqal BAIÁDIL,
«Egemen Qazaqstan»
Aqmola oblysy