Bul kúnderi Kanadanyń Vankýver qalasynda mánerlep syrǵanaýdan Gran-prı dodasy ótýde. Bul jarysta Qazaqstannyń da sportshylary baq synaýda.
Áıelder arasyndaǵy qysqa baǵdarlama 16 jastaǵy Japonııanyń jas juldyzy Rıka Kıhıranyń álemdik rekordymen aıaqtaldy. Onyń kórsetkishi – 82,51 upaı. Reseıdiń dańqty qos sportshysyna – Olımpııa oıyndarynyń jeńimpazy, Eýropa chempıony Alına Zagıtova (77,93 upaı) men álem jáne qurlyq chempıony Elızaveta Toqtamysheva (70,65) ekinshi jáne úshinshi oryndardy qanaǵat tutty.
Erlerdiń qysqa baǵdarlamasynda komandalyq saıystaǵy Olımpııa oıyndarynyń qola júldegeri, álem chempıony, amerıkalyq Natan Chen (92,99 upaı) top jarsa, odan keıingi eki satyǵa Olımpıada jáne álem chempıonattarynyń eki dúrkin kúmis júldegeri japonııalyq Soma Ýno (91,67 upaı) men chehııalyq Mıhal Brjezına (89,21 upaı) jaıǵasty. Qazaqstandyq Nıkıta Mınko 16 satyǵa taban tiredi.
Osy jarystyń juptyq saıysynda óner kórsetken jerlesterimiz – Jansaıa Ádihanova men Ábish Baıtqanov 9 oryn alsa, jasóspirimder básekesinde Rahat Bralın men Alana Toqtarova qola medaldi moıyndaryna ildi.
Ǵalym SÚLEIMEN,
«Egemen Qazaqstan»