Qyzylorda qalasyndaǵy hımııa-bıologııalyq baǵyttaǵy Nazarbaev Zııatkerlik mektebinde Qyzylorda oblysy ákiminiń orynbasary Rýslan Rústemovtiń tóraǵalyǵymen Qamqorshylyq Keńestiń kezekti otyrysy ótti.
Bıylǵy oqý jylyndaǵy Qamqorshylyq keńestiń alǵashqy otyrysynda Qamqorshylyq keńestiń quramy men jospary bekitildi. Qyzylorda qalasyndaǵy Nazarbaev Zııatkerlik mektebi dırektory Baqyt Jumataıdyń 2017-2018 oqý jyly boıynsha esebi tyńdaldy. Mektep 2018 jyly xalyqaralyq akkredıtasııadan sátti ótip, 100-ge jýyq mektep oqýshylary xalyqaralyq, respýblıkalyq,aımaqtyq pándik olımpıadalardyń jeńimpazdaryn daıyndady. Mektepten túlep ushqan 382 túlektiń 35-i Nazarbaev Ýnıversıtetiniń stýdentteri, taǵy 29 shákirti álemdegi 8 memlekettiń bilim granttaryn ıelenip, bedeldi oqý oryndarynda joǵary bilim alyp jatyr. Mektep dırektory Ulybrıtanııanyń ulttyq ortalyǵy Nazarbaev Zııatkerlik mektepteriniń NIS-Programme bilim baǵdarlamasynyń General Certificate of Education A-Level deńgeıine sáıkestigin rastaǵandyǵy týraly aıtty. Bul túlekterdiń qazaqstandyq 10 bedeldi joǵary oqý ornyna 2 kýrstan, al Kembrıdj jáne Germanııadaǵy ýnıversıtetterge ýnıversıtetaldy daıyndyq kýrsyna qatyspaı-aq oqýǵa qabyldanýyna kómek beredi.
Baıandamadan soń mekteptiń qyzmetin jaqsartýǵa baǵyttalǵan aǵymdaǵy máseleler qaralyp, Qamqorshylyq keńes músheleriniń zııatkerlik áleýetti qalyptastyrýda ózge de usynystary men pikirleri tyńdaldy.
Baqtııar TAIJAN,
«Egemen Qazaqstan»
Qyzylorda oblysy