Táýelsizdik merekesi qarsańynda Aıagóz qalasynda 600 oryndyq mektep esigin aıqara ashty. Memlekettik «Nurly jol» baǵdarlamasy aıasynda salynǵan bilim ordasynyń ashylý saltanatyna oblys ákiminiń orynbasary Serik Aqtanov, Aıagóz aýdanynyń ákimi Baqytjan Baıahmetov, aýdandyq máslıhat hatshysy Seıilbek Ysqaqov, aqsaqaldar, áskerı bólim komandırleri men qyzmetkerleri, qalashyq turǵyndary qatysty.
Aýdan ákimdiginiń qyzmetkerleri mekteptiń ashylýy shahardaǵy úsh aýysymdy bilim berý máselesin tolyǵymen sheshkenin aıtady. Sonymen qatar aldaǵy ýaqytta Ońtústik qalashyqta turǵyndar sanynyń kún sanap artýyna baılanysty burynǵy №4 orta mektep ǵımaratyn bala-baqsha retinde qaıta qurý úshin jobalyq smetalyq qujattar ázirlenip jatyr eken.
Jańa bilim ordasynyń paıdalanýǵa berilgenine ata-analar rızashylyqtaryn bildirdi. Áskerı qyzmetker Áıgerim Omarbekqyzy burynǵy mektep oqýshylarǵa tarlyq etip kelgenin jetkizdi. «Balalarymyzdyń úsh aýysymda oqýy janǵa batýshy edi. Endi keń ári jaıly mektepte oqıtyn boldy. Mektepte zaman talabyna saı, barlyq qajetti qural jabdyqtar bar», - deıdi ol.
Reti kelgende aıta keteıik, Aıagóz aýdanynda bilim salasyna aıryqsha kóńil bólinýde. Byltyr mektepterdi qajetti tehnıkalyq qural-jabdyqtarmen qamtamasyz etýge jergilikti bıýdjetten 95 mıllıon teńgeden astam qarjy bólinse, bıyl mektepterdi aǵymdaǵy jóndeýden ótkizýge jergilikti bıýdjetten 128639.9 teńge qarajat qarastyrylypty. «Meniń mektebim» aksııasy boıynsha jergilikti kásipkerler oblystyq «Paryz» qoryna 29 mln teńge jınap, aksııa aıasynda 4 hımııa, 3 fızıka, 9 bıologııa, 19 robototehnıka kabınetteri ashylypty.
Azamat QASYM,
«Egemen Qazaqstan»
Shyǵys Qazaqstan oblysy,
Aıagóz aýdany