Túrkistan oblysynda mesenattardyń eńbegin qoldaý maqsatynda bıyl jazda «Jomart júrek» syılyǵynyń 1-kezeńi ótkizilip, 20 azamat marapattalǵan bolatyn. Jomart jandar qatary búginde arta túskeni anyq.
Olaı deıtinimiz, bıyl Túrkistan oblysynda «Týǵan jer» arnaıy jobasy boıynsha demeýshilerdiń kómegimen 97 nysan iske qosyldy. Olardyń 28-i bilim mekemeleriniń qurylysy bolsa, 3 ǵımarat qaıta jóndeýden ótkizilgen. Sonymen birge, 2 medısına mekemesi, 12 sport nysany ashylyp, 2 sport alańy jóndeldi. Mádenıet salasynda 15 nysan paıdalanýǵa berilip, 5-ýi qaıta jóndeýden ótkizilse, abattandyrý boıynsha 30 joba iske asyrylǵan. Osylaısha kásipkerler Elbasynyń «Bolashaqqa baǵdar: rýhanı jańǵyrý» atty baǵdarlamalyq maqalasynda aıtylǵan bastamany júzege asyryp otyr. «Qazaq «Týǵan jerge týyńdy tik» dep beker aıtpaǵan. Patrıotızm kindik qanyń tamǵan jerińe, ósken aýylyńa, qalań men óńirińe, ıaǵnı týǵan jerińe degen súıispenshilikten bastalady. Sol sebepti, men «Týǵan jer» baǵdarlamasyn qolǵa alýdy usynamyn», - degen bolatyn Memleket basshysy baǵdarlamalyq maqalada.
Búginde jomart kásipkerlerdiń demeýshiligimen paıdalanýǵa berilgen nysandar el ıgiligine qyzmet etip jatyr. Máselen, Otyrar aýdanynda quny 248 mln. teńgeni quraıtyn sport kesheni men boks zaly jastarǵa esigin aıqara ashty. Al, Báıdibek aýdanynda 14,3 shaqyrym jolǵa «Aqyldy sham» jelisi ornatylǵan. Bul ıgi iske demeýshi kásipker 195 mln. teńge jumsaǵan. Qazyǵurt aýdanyndaǵy quny 100 mln. teńge quraıtyn Salqam Jáńgir han men Jalańtós bahadúrge arnalǵan memorıaldyq kesheni, Kentaý qalasyndaǵy quny 80 mln. teńge jáne Saryǵash aýdanyndaǵy quny 50 mln. teńge bolatyn sport keshenderi de elge qyzmet etýde. Tólebı aýdanynda ashylǵan «KazMed» medısınalyq ortalyǵy, Saıram aýdanynda 125 oryndyq balabaqsha jáne ózge de áleýmettik nysandar týǵan jerin súıetin kásipkerlerdiń kómegimen salynǵan.
Ǵalymjan ELShIBAI,
«Egemen Qazaqstan»
Túrkistan oblysy.