Prezıdent Nursultan Nazarbaevtyń maqalasy halqymyzdyń mártebesin taǵy bir kóterip tastady. Sonymen birge Uly dalanyń qasıetin, onda qalǵan ata-baba izi adamzattyń damý tarıhyna qosylar úlken úles ekenin taǵy bir aıqyndap bergendeı. Maqalada aıǵaqtalǵan málimetter mektep oqýshylarynan bastap, aǵa urpaq ókilderi arasynda talqylanýy qajet dep oılaımyn.
Maqala bılik basyndaǵy «tehnokrattarǵa» oı salyp, mektepterde, kolledjderde jáne joǵary oqý oryndarynda oqytylyp jatqan tarıh pániniń oqý jospary men onyń sapasyna kóńil aýdarady ǵoı degen úmittemin.
Maqalada búgingi tarıh ǵylymynda eskerilmeı jatqan kóptegen problemalar nazarǵa alynǵan. Ásirese búkil túrki halyqtaryna ortaq tarıhymyz tereń zerdelengen. Tarıh bizdi bir-birimizden alshaqtatpaı, kerisinshe biriktiretin faktor bolýǵa tıisti. Bul – dáleldeýdi qajet etpeıtin aksıoma. «Qazaqstan – búkil túrki halyqtarynyń qara shańyraǵy» degen Elbasymyzdyń ıdeıasyn bar yqylasymmen qoldaımyn. Maqalada tarıhshylarǵa úlken úmit artylyp otyr.
Kez kelgen tarıhı shyǵarma derek negizinde jazylatyndyǵy belgili. Sondyqtan da arhıv derekterin izdeý, tabý jáne taldaý, sóıtip olardy ǵylymı aınalymǵa qosý ońaı sharýa emes. Onyń ústine kórshi elder arhıvindegi halqymyz tarıhyna qatysty qujattardy alý, tipti qıyndap ketti. Táýelsizdik jyldarynda jınaqtalǵan arhıv qujattarynyń ǵylymı aınalymǵa túspeı jatqandyǵy da belgili. О́ıtkeni olardy oqıtyn jáne taldaıtyn mamanǵa zárýmiz. О́kinishtisi elimizdiń birde-bir oqý orny derektanýshy maman daıyndamaıdy.
Prezıdentimiz tarıhymyzdaǵy tulǵalar róli máselesine kóńil aýdarǵan eken. Búginde jer-jerlerde tulǵalar jóninde irili-ýaqty kitap, kitapshalar shyǵyp, eskertkishter qoıylyp júr. Biraq eskertkishterdiń mártebesin anyqtap, olar jóninde derekter jınap jatqan eshkim joq. Sonymen qatar artynda aqshaly urpaǵy bar kisilerge de kósheniń atyn berý isin tyqpalaý da joq emes. Sondyqtan tulǵataný ǵylymyn qalyptastyrýymyz qajet. Onyń metodologııalyq jáne teorııalyq negizderiniń jasalýy kezek kúttirmeıtin másele.
Amanjol KÚZEMBAIULY,
tarıh ǵylymdarynyń doktory,
professor
QOSTANAI