...oı qosady
Qurmet áýejaıdan bastalady
Aıa О́mirtaıdyń elimizdiń bas gazeti «Egemen Qazaqstanda» shyqqan «Astanadaǵy ataýlar» atty maqalasyna oraı pikir bildirgendi jón sanadym.
Tilimizdiń alashubar bolyp bara jatqany, soǵan oraı aıtylǵan syn pikirlerdiń oryndalmaı jatqany qynjyltady. Ata-jurtty ańsap, egemendik alǵan elimdi, jerimdi, Astanamdy bir kórip qaıtsam dep jan-jaqtan keletin aǵaıyndar az bolmasy anyq. Osyny eskerip, aldymen áýejaıdy qolǵa alsaq deımin. Iаǵnı qonaqtardyń túse salysymen janary – «Qazaq eline, atamekenge qosh keldińizder!» degen áıdik plakattarǵa tússe, qatarlasa elimizdiń áıgili ánshileri – Roza Rymbaeva, Bıbigúl Tólegenovalar sııaqty ardaqty azamattary ulttyq kıim kıip, qolyna úkili dombyra ustaǵan keıpimen baýyrsaǵyn shashyp, sary qymyzyn sapyryp turǵan qyzdardyń sýretteri úlken taqtaǵa qoıylsa degen oı týyndaıdy.
Mamaı KELGENBAIULY
Aqmola oblysy,
Nuresil aýyly
...úlgi tutady
Oqýǵa qajetti kitaptar usynyldy
Byltyrǵy oqý jylynan bastap oblystyq oqý-ádistemelik ortalyǵynyń uıymdastyrýymen oqýshylardyń kitap oqýǵa qyzyǵýshylyǵyn arttyrý, kórkem ádebıetti oqý arqyly jasóspirimderdiń rýhanı jáne adamgershilik áleýetin damytý maqsatynda oblystyq «Bir aımaq – bir kitap» aksııasy barlyq mektepterde ótkizildi.
Bıyl aksııa aıasynda «Qazaq ertegileri» (2-4 synyptar), Q.Qaısenovtiń «Jaý tylyndaǵy bala» povesi ( 5-7 synyptar), S.Muqanovtyń «Balýan Sholaq» povesi ( 8-9 synyptar), Ǵ.Mustafınniń «Qaraǵandy» romany (10-11 synyptar) oqýǵa usynyldy. Aksııa «Men oqımyn, sen oqısyń, bári oqıdy» uranyn arqaý etti. Keleshek urpaqqa kitap tańdaýdy, kitap oqýdy úıretsek, ol Prezıdentimizdiń «Máńgilik el» ıdeıasyn iske asyrý joldarynyń biri bolary sózsiz.
B.QÝANYShBEKOVA,
B.Amalbekov atyndaǵy orta mekteptiń kitaphana meńgerýshisi
Qaraǵandy oblysy,
Jańaarqa aýdany
...rızashylyǵyn jetkizedi
Bilim kókjıegi keńeıdi
Aqtóbeniń «Aqjar-2» aýylynda paıdalanýǵa berilgen mektep 900 oqýshyǵa shaqtalǵan. Oqýshylar eki aýysymda, 48 synypta bilim alady. Úsh qabatty ǵımarat tolyq jabdyqtalǵan. Jalpy aýmaǵy 12 myń sharshy metr. Mekteptiń bir ereksheligi – munda múmkindigi shekteýli balalardyń bilim alýyna barlyq jaǵdaı jasalǵan. Máselen, lıft qosýly, pandýs mekteptiń syrty men ishinde de ornalastyrylǵan. Mektepte kompıýter kabıneti, fızıka-hımııa laboratorııasy, ınteraktıvti taqtalar, ashana men eńbek pánine baýlıtyn sheberhanalar bar. Bul mektep aýyldaǵy úsh aýysymda bilim alý problemasyn sheship otyr. О́ıtkeni Aqjardaǵy №45 pen №49 mektepterde balalar úsh aýysymda oqıtyn. Aıta keteıik, bilim ordasynyń qurylysyna oblys bıýdjetinen 1,7 mlrd teńge bólinip, byltyr jazda irgesi qalanǵan edi.
Altynaı SAǴYNDYQOVA
Aqtóbe oblysy
...pikirin bólisedi
Sálem salýdyń sókettigi joq
Əıel ədebine baılanysty bala kezimnen este qalǵan bir jaıt eske túsip otyr. Mektebimizdiń dırektory bolǵan Təshkenbaı degen aǵamyz qalada oqyp, joǵary bilim alǵan Dúrdana təteıimizdi kelin etip túsiredi. Bir kúni osy shańyraqqa aýyl aqsaqaldary soǵym basyna jınalady. Qazaqy dəstúr boıynsha et jelinip bitkennen keıin úlkenderden qaıtqan tabaqty alǵan kelin səlem salýy kerek. Tabaqtyń túbine kelinniń sybaǵasyn qaldyryp qoıady. Tabaqtyń bos qaıtqany durys emes. Qalada oqyp orys tərbıesin alǵan kelin ne biler deısiń dep oılaǵan qarııalar sol kúni tabaqtaǵy etti túk qaldyrmaı jep qoıady. Bos qaıtqan tabaqty alyp jatyp Dúrdana təteıimiz: «Bos tabaqqa da bir səlem!» dep, tabaqty tóńkerip turyp səlem salyp, esikten shyǵyp ketedi. Aýyl qarııalary jas kelinniń tapqyrlyǵyna əri rıza bolyp, əri qysylyp, bul jaıdy kópke deıin umyta almaı júripti.
Al qazir qala tərbıesin alǵan búginginiń kelinderi tabaqqa səlem salý degenniń mənin túsine me eken ózi? Osy bir tálim-tárbıeli dástúrimizdiń el ishinde saqtalyp otyrǵanyna táýbe etip, áli de óz ónegesin úlgi etip, ásirese qalaly jerlerde qalys qalmaı, kelinderdiń qaı-qaıda da sálem salýdy umytpaǵandary jón bolar edi.
Gúlmárııa BARMANBEKOVA
Almaty
...ókinish bildiredi
Aǵalarymyz durystap uryspaǵan...
Baıaǵyda temeki tartyp ustalyp qalǵanymyzda aǵalarymyz durystap uryspaǵan. Ustalyp qalǵanymyzda «óstip júrip bir kúni qorany órteısiń» dep, bastan bir uryp jibere salǵan. Sodan biz temekiniń jalǵyz zııany sol, qoranyń órtenip ketýine sebep bolady dep oılaǵanbyz. Sodan ne kerek, qorany órtep almasaq boldy dep, asa saqtyqpen býdaqtata berdik. Qoradan alys ketip, dala jaqqa baryp tarttyq. Tarap ketken kolxozdyń garajy jaqqa baryp shektik. Jabylyp qalǵan klýbtyń artyna baryp býdaqtattyq. Buzaý izdeı shyqqanda sazda júrip tútindettik. Qora órtenbese boldy, shóp órtenbese boldy dedik. О́rtenetin shóbi joq, qorasyz qalaǵa kelgende múlde ashyq kettik. Endi ne boldy? Sol kezde aǵalarymyz: О́stip júrip qorany órteısiń dep qoıa salmaı, osynshama beıshara qylatynyn túsindirgende, tereńdemeı turǵanda qoıa salar ma edik, kim bilsin. Endi mine, jetpistegi ákemniń jarty jasyna kelmesten, jazdy kúni shildede toqsandaǵy shal qusap kúrk-kúrk jótelip júrmiz...
Beıbit SARYBAI
Almaty