Elbasy Nursultan Nazarbaev jýrnalısterge bergen suhbatynda Qazaqstandaǵy turǵyn úı máselesine toqtalyp, 2018 jyly qoldanysqa berilgen turǵyn úı kólemi rekordtyq kórsetkishke jetetinin málimdedi.
«Turǵyn úı máselesi – óte mańyzdy. Bul baǵytta qansha jumys atqarsań da, eshqashan bitpeıdi. Biraq muny jaqsy jaǵynan túsiný qajet. О́ıtkeni halyqtyń sany artyp, qajettiligi ósip keledi degen sóz. Keıingi kezde kóptegen ıgi bastamalar iske qosyldy. Máselen, Turǵyn úı qurylys jınaq bankiniń paıyzdyq mólsherlemesi tómen ekeni belgili. Bul jumys jalǵasa beredi. Ekinshiden, múmkindigi shekteýli, áleýmettik turmysy tómen otbasylaryna arnap memlekettik turǵyn úıler salynyp jatyr», dedi Memleket basshysy.
Prezıdent «Nurly jer» baǵdarlamasy aıasynda óte kóp mólsherde úı berilgenin atap ótip, «7-20-25» baǵdarlamasynyń tıimdi tusyn aıtyp berdi.
«Buryn bankterge páter qunynyń 50 paıyzyn jınaý qajet edi. Qazir bul soma 20 paıyzǵa azaıtyldy. Ulttyq bankte paıyzdyq mólsherleme – 12,5-ti quraıdy. Al bul baǵdarlama boıynsha 7 paıyzben nesıe beriledi. Qalǵanyn memleket óteıdi. Bul – halyqty turǵyn úımen qamtamasyz etý úshin jumsaıtyn qarajaty», dedi N.Nazarbaev.
Budan keıin Memleket basshysy turǵyn úı qurylysynyń qarqyny joǵary ekenin aıtyp, byltyr rekordtyq kórsetkishke qol jetkizgenimizdi málimdedi.
«2017 jyly 11 mıllıon sharshy metr turǵyn úı qoldanysqa berildi. Bul – tarıhı kórsetkish. Bıyl muny 12 mıllıonǵa jetkizemiz. Bul – 100 000 páterge teń. Iаǵnı, jyl saıyn jarty mıllıon turǵyn jańa úıge kiredi. Mundaı jumystar aldaǵy ýaqytta da jalǵasa beredi», dedi Prezıdent.