«Rýhanı jańǵyrý» baǵdarlamasyn iske asyrý jónindegi Ulttyq komıssııa hatshysy, Prezıdent Ákimshiliginiń Ishki saıasat bóliminiń meńgerýshisi Aıda Balaeva qazirgi qazaq ádebıeti antologııalaryn BUU-nyń 6 tiline aýdaryp jatqan aýdarmashy, redaktorlarmen kezdesti. Bul týraly «QazAqparat» HAA habarlady.
Kezdesýde Ulybrıtanııa, Ispanııa, Fransııa, Reseı jáne Qytaı memleketterinen kelgen aýdarmashy-ádebıetshilermen qazaq ádebıeti jınaqtaryn aýdarý barysy talqylandy. Aıda Ǵalymqyzy qazaq ádebıetiniń úzdik úlgilerin BUU-nyń 6 tiline aýdarý bastamasy buryn-sońdy bolmaǵan erekshe joba ekendigine toqtalyp, «bizdiń basty mindetimiz - aýdarmanyń kórkemdik sapasyn qamtamasyz etý. Biz ol úshin qajet dúnıeniń barlyǵyn istep jatyrmyz. Sondyqtan, aýdarmashylar men bizdiń avtorlardyń osyndaı kezdesýi osy mindetti oryndaýymyzǵa septigin tıgizedi degen úmittemin», - dedi. Sonymen birge, Prezıdent Nursultan Nazarbaevtyń «Rýhanı jańǵyrý», «Uly dalanyń jeti qyry» maqalalarynda aıtylǵan mádenıet pen ádebıetti damytýǵa baǵyttalǵan sharalarymen tanystyryp, ony iske asyrýǵa atsalysýǵa shaqyrdy.