Jýyrda Shymkent qalasy ákimdiginde Elbasy tapsyrmasyna sáıkes, kommýnaldyq tarıfterdi retteýge baılanysty jıyn ótken bolatyn. Onda, óńirdegi monopolıs mekeme basshylary jyly oryndarynan qımyldap, esep berip, betimen ketken baǵany tómendetý úshin tarıfti qaıta qaraýǵa ýáde etken edi.
Kommýnaldyq sala jaýaptylarynyń sózine sener bolsaq, basqa elderden qymbat kógildir otyn paıdalanyp, arzan emes sý iship, quny joǵary jaryq tutynyp keledi ekenbiz. Halyqtyń qaltasyn qaǵyp, artyq tólemin alyp otyrǵan alpaýyt mekeme basshylarynyń Prezıdent synynan keıin myń qubylyp bylaısha aqtalǵanyna tipti kúlkińiz keledi.
Búginge deıin Shymkent qalasy turǵyndary О́zbekstannan kelgen kógildir otyn paıdalanyp keldi. Alaıda, irgedegi kórshiden alǵan tabıǵı gazdyń quny eldiń ekonomıkalyq ortalyǵy Almaty qalasyndaǵy tarıf qunynan da qymbat. Osy máseleni turǵyndar talaı ret kótergen tuǵyn. Biraq, selt etken monopolıster bolmady.
«Shymkent qalasynda sýdyń baǵasy da qymbat», deıdi mamandar. Al, «Sý resýrstary marketıng» mekemesi jaýaptylarynyń aıtýynsha, tutynýshylarǵa esepteýish quraldar qoıylǵan, esesine ár turǵyn 200 teńgeden artyq aqy tólemeıdi eken.
«Biz árqashanda Elbasynyń bastamasyn qoldaımyz. Sondyqtan baǵany tómendetýge ýáde beremiz», deıdi «Sý resýrstary marketıng» JShS-niń dırektory Anarbek Orman.
Shymkenttegi sapaly elektr jaryǵynyń quny da qaltaǵa salmaq salady. Talaı márte óz aýdandarynan saılanǵan depýtattarǵa dat aıtqan halyqtyń taýy shaǵylǵan. Monopolıster halyqtyń sózin júre tyńdaıdy. Jergilikti bılik organdarynan naqty tapsyrma túspeı olar jep otyrǵan «kúlshelerinen» aırylar emes deıdi kópshilik.
Qalany jaryq energııasymen qamtamasyz etetin «Ońtústik jaryq Tranzıt» mekemesiniń tarıfi de tómen emes. Jaryq baǵamy boıynsha, shymkenttikter 8 orynda tur.
Kezdesýde jolaqysy men qatty turmystyq qaldyqtardy shyǵarý tarıfi de qaraldy. Sala mamandary baıandama jasaǵanymen, aqysyn arzandatamyn degenderi kóp bolmady. Ákimdik jaýaptylary barlyq kommýnaldyq qyzmet kórsetetin mekemelerde tarıf máselesine qatysty tekserý júrgizetinin jetkizdi.
О́z kezeginde olar osyǵan deıin kommýnaldyq baǵa baǵamyna túsinistikpen qaraǵan qala ákimi Ǵabıdolla Ábdirahymovqa alǵys aıtyp, tarıfti qaıta qaraýǵa ýáde etti.
Osylaısha jergilikti bılik pen kommýnaldyq kompanııa basshylarynyń jyl sońyndaǵy kezdesýinen kóp ótpeı qańtar aıynan bastap shahardaǵy kommýnaldyq qyzmet baǵasy arzandaıdy degen habar tarady.
«Elimizdiń úshinshi megapolısinde gaz, jaryq, aýyz sý, jylý, káriz júıeleriniń qyzmet kórsetý quny aldyńǵy jyldarmen salystyrǵan birneshe paıyzǵa tómendeıdi. Qańtar aıynan bastap Shymkent qalasynda jylý baǵasy 17, jaryq 6,8, aýyz sý 10, káriz júıesi qyzmeti 10, kógildir otyn 3,3 paıyzǵa tómendeıdi», deıdi qalalyq energetıka jáne kommýnaldyq sharýashylyq basqarmasynyń basshysy Nurlan Amanqulov.
Jaǵymdy jańalyqtan habardar bolǵan qala turǵyndary «Prezıdent tapsyrma bermese, bular qoıan bultaqpen tarıf baǵasyn tómendetpeıtin edi», dep shýlasty.
Nurshat TО́KEN,
«Egemen Qazaqstan»