Aımaqta áıelder arasyndaǵy jatyr moıny obyrynyń qaterli isigi dertiniń aldyn alý sharalary júrip jatyr. Qazir oblys boıynsha 1332 adam onkologtardyń esebine alynǵan.
Alaıda, Almaty aımaqtyq onkologııalyq dıspanseriniń dárigerleri bul kórsetkish áli de ósýi múmkin deıdi. О́ıtkeni, aty jaman derttiń alǵashqy belgilerin anyqtaý baıaý júrip jatyr eken. Oǵan áıelderdiń óz densaýlyǵyna salǵyrt qarap, der kezinde dárigerge qaralmaýy men skrınıngten ótýge kelmeýi sebep deıdi mamandar.
- Alys aýyldarda turatyn áıelder der kezinde skrınıng testten ótpeýi saldarynan kóbine aýrýdyń 3-4 satysynda ǵana dáriger kómegine júginedi. Nóldik satyda, ıaǵnı bastapqy kezeńde aýrý anyqtalǵan jaǵdaıda áıel aýrýdan tolyq jazylyp ketedi dep senimmen aıtýǵa bolady, - deıdi Almaty aımaqtyq onkologııalyq dıspanseriniń dırektory Saıahat Oljaev
О́tken jyly osy dıspanserde 70 myń áıel skrınıng test tapsyrǵan. Olardyń ishinen 812 áıel tirkeýge alynypty. Bulardyń 38 prosenti ǵana aýrýdyń birinshi satysynda dáriger kómegine júgingen eken. О́kinishke qaraı, byltyr osy dertten oblys boıynsha 63 áıel jaryq dúnıemen qoshtasypty.
Qalmahanbet MUQAMETQALI,
«Egemen Qazaqstan»
Almaty oblysy