Qazaqstan men Qyrǵyzstan shekarasyndaǵy atystan bir adam mert boldy. Al shekara buzǵan qalǵan eki azamat qashyp ketti.
Ulttyq qaýipsizdik qyzmetiniń habarlaýynsha, oqıǵa Taraz shekara otrıadynyń «Jasórken» zastavasyna qarama-qarsy jerde 2019 jylǵy 23 qańtarda bolǵan.
Qyrǵyz Respýblıkasynyń shekara jasaǵy el aýmaǵynan 10 jylqy aıdap ótýge talpynǵan 3 zań buzýshyny anyqtaǵan. Ustaý kezinde shekara buzýshylar qarsylyq kórsetip, sýyq qarýdy qoldanǵan. Olarǵa qarsy shekarashylar da oq atqan. Nátıjesinde zań buzýshylardyń biri oq tıip, jaraqat alǵan. Qalǵan eki belgisiz adam jylqylarmen Qazaqstan Respýblıkasy aýmaǵynda jasyrynǵan.
Jaraqat alǵan shekara buzýshy (Qazaqstan azamaty) Talas aýyly aýrýhanasyna barar jolda qaza tapqan.
Qazirgi tańda Taraz shekara otrıadynyń kúshteri jáne quraldarymen shekara buzýshylar men jylqylardy izdeý sharalaryn júrgizip jatyr.
Osy oqıǵaǵa baılanysty Syrtqy ister mınıstrligi resmı ókili Aıbek Smadııarov málimdeme jasady. Onyń aıtýynsha, qazaqstandyq dıplomattar resmı túrde Qyrǵyzstan tarapynan oqıǵanyń mán-jaıy týraly tolyq aqparatty suratqan.
«Bizdiń Bishkektegi Elshiligimiz oqıǵanyń barlyq egjeı-tegjeıin anyqtaǵannan keıin mundaı jaǵdaılarda tıisti quqyqtyq jáne uıymdastyrý, sonyń ishinde qujattardy rásimdeý jáne marqumnyń denesin otanyna jiberý sharalaryn qabyldaıdy. Qazirgi ýaqytta Qazaqstan men Qyrǵyzstannyń shekara jáne konsýldyq qyzmetteri tıisti sharalardy júrgizip jatyr», delingen habarlamada.
Ulttyq qaýipsizdik qyzmetiniń habarlaýynsha, qaıtys bolǵan shekara buzýshy buǵan deıin «Qazaqstan Respýblıkasynyń Memlekettik shekarasyn qasaqana zańsyz kesip ótý» boıynsha sottalǵan.